फेडेरर मियामी ओपनको क्वार्टरफाईनलमा

एजेन्सी । रोजर फेडेरर मियामी ओपन टेनिसको क्वार्टरफाईनलमा प्रवेश गरेका छन् । तीन पटकका च्याम्पियन फेडेररले रुसका डेनियल मेदवेदेवलाई पछाडी पार्दै प्रतियोगिताको अन्तिम ८ मा प्रवेश गरेका हुन् ।

स्विस खेलाडी फेडेररले सन् २०१७ मा अन्तिम पटक मियामी ओपन टेनिसको उपाधि जितेका थिए । उनले १३ औ वरियताका डेनियललाई ६–४ र ६–२ को सेटमा पराजित गर्न एक घण्टा एक मिनेटको समय लगाए ।

उनले अन्तिम ८ को खेलमा साउथ अफ्रिकाका केभिन एन्डरसनसंग खेल्नेछन् । ‘मलाई लाग्छ, यो निकै रोमाञ्चक खेल बन्यो ।’ उनले भने ।

‘यो साता मैले निकै राम्रो खेलिरहेको छु । मलाई लाग्छ, आगामी दिनमा समेत यसलाई निरन्तरता दिन सक्नेछु ।’ उनले थपे ।

विश्व वरियताको पाँचौ स्थानमा रहेका फेडेररले एन्डरसनसंग पछिल्ला पाँच भेटमा मात्र एक खेल गुमाएका छन् । एन्डरसनले अष्ट्रेलियाका जोर्डन थम्सनलाई ७–५ र ७–५ मा पराजित गर्दै क्वार्टरफाईनल पुगेका हुन् ।