काठमाडौं । खेलकुद मन्त्री जगत विश्वकर्माले आठौं वृहत राष्ट्रिय खेलकुद प्रतियोगिताको बिषयमा निर्णय गर्न बोर्ड बैठक बोलाएका छन् ।
प्रतियोगिता आयोजनाको मितिलाई लिएर अन्यौलता देखिएको समय खेलकुद मन्त्री विश्वकर्माले राखेपको बोर्ड बैठक आह्वान गरेका हुन् ।
उनले आठौंको बिषयमा निर्णय गर्न चैत १५ गते बोर्डको बैठक राखेका छन् ।
सोही बैठकले आठौंको राष्ट्रिय खेलकुदको बिषयमा सरकारको आधिकारिक धारणा तय गर्नेछ । प्रतियोगिताको मितिलाई लिएर राष्ट्रिय खेलकुद परिषद राखेप र खेलकुद मन्त्रालयबीच विवाद देखिदै आएको छ ।
परिषद सदस्य सचिव प्रत्येक दुई बर्षमा आयोजना हुने प्रतियोगिता चैतमा सम्पन्न गर्नुपर्ने अडानमा छन् ।
खेलकुद मन्त्री विश्वकर्मा बैशाखको पहिलो साताको बिषयमा निर्णय हुन सक्ने बताईरहेका छन् ।
प्रतियोगिता आयोजनाकालागि बनिरहेका पुर्वाधारको निरिक्षण गर्न खेलकुद मन्त्री प्रदेश नम्बर पाँचका विभिन्न जिल्लामा रहेका छन् । उनी सोमबार मात्रै बाँकेको विभिन्न स्थानमा बनिरहेका खेलकुद पुर्वाधारणको निरिक्षण गरेका थिए ।
राखेप सदस्य सचिव विष्ट भने केही साता अघिदेखिनै नेपालगञ्जमा बसेर पुर्वाधार निर्माणको निरिक्षण गरिरहेका छन् ।
सोमबार साँझ नेपालगञ्जमा आयोजित कार्यक्रममा खेलकुद मन्त्री विश्वकर्माले पुर्वाधार निर्माणको काम अन्तिम चरणमा पुगेको बताएका थिए । उनले चैत १५ गते राखेपको बोर्ड बैठक बसेर आठौंको बिषयमा निर्णय गर्ने जानकारी दिएका थिए ।
उनका अनुसार चैत १५ गते बोर्ड बैठक र चैत २० गते नेपालगञ्जमा मुल आयोजक समारोह समितिको बैठक बस्ने छ ।
यसअघि राखेप सदस्य सचिव विष्ट संयोजकत्वको कार्यकारी समितिले चैत २५ गते प्रतियोतिगाको औपचारिक उद्घाटन गर्ने गरि मिति तोक्न बोर्ड बैठकमा प्रस्ताव पेश गरेको थियो ।
तर पछिल्ला सार्वजनीक कार्यक्रममा सदस्य सचिव विष्टले चैत २७ गते प्रतियोगिताको औपचारिक उद्घाटन हुने दाबी गर्न थालेका छन् । सदस्य सचिव र खेलकुद मन्त्रीको फरक फरक बक्तब्यले प्रतियोगिता आयोजनालाई लिएर अन्यौलता उत्पन्न भएको छ ।
