काठमाडौं । माउन्टेन बाइक राष्ट्रिय च्याम्पियनसिप चैत पहिलो साता आयोजना हुने भएको छ । आयोजक नेपाल साइक्लिङ संघले आइतबार पत्रकार सम्मेलन गर्दै च्याम्पियनसिप चैत पहिलो साता हुने जनाएको छ ।
गोकर्णेश्वर नगरपालिकास्थित जगडोलमा आयोजना हुने च्याम्पियनसिप चैत १ र २ गते हुनेछ । च्याम्पियनसिपमा माउन्टेन बाइक अन्तर्गतको क्रस कन्ट्री र डाउन हिलमा प्रतिस्पर्धा हुनेछ । यो प्रतियोगिता १७ औं क्रस कन्ट्री र नवौं डाउन हिल प्रतियोगिता समेत हो ।
क्रस कन्ट्रीको पुरुषतर्फ इलिट पुरुष/महिला, जुनियर पुरुष /महिला र मास्टर पुरुष विधामा १२ पदकको लागि प्रतिस्पर्धा हुनेछ । डाउन हिलतर्फ इलिट पुरुष/महिला र जुनियर पुरुषमा ९ पदकको लागि प्रतिस्पर्धा हुनेछ ।
विजेताले ट्रफी, मेडल र प्रमाणपत्र प्राप्त गर्नेछन् ।
