अख्तियार पुग्यो एन्फा अनुसन्धानको फाईल

काठमाडौं । अखिल नेपाल फुटबल संघ एन्फामा भएको भनिएको आर्थिक अनियमितता र भ्रष्टचारको बिषयमा अनुसन्धान गरि तयार पारिएको प्रतिवेदन अख्तियार दुरुपयोग अनुसन्धानमा पुगेको छ ।

युवा तथा खेलकुद मन्त्रालयले एन्फाको बिषयमा अनुसन्धान गर्न गठन गरेको तीन सदस्यीय समितिले तयार पारेको प्रतिवेदन अख्तियारमा पुगेको हो ।

एन्फाभित्र ब्यापक आर्थिक अनियमितता र भ्रष्टाचार भएको दाबी गर्दै पुर्व वरिष्ठ उपाध्यक्ष मणी कुँवर र एन्फाका चार सदस्य जिल्लाले विभिन्न निकायमा उजुरी गरेपछि अख्तियारले अनुसन्धान समिति गठन गरेर छानविन गर्न खेलकुद मन्त्रालयलाई निर्देशन दिएको थियो ।

अख्तियारले आरोपका विभिन्न १४ बुदाँमा केन्द्रित रहेर प्रारम्भिक अनुुसन्धान गर्न मन्त्रालयलाई १५ दिनको समयसिमा दिएको थियो । लगत्तै मन्त्रालयले खेलकुद सह सचिव अणप्रसाद न्यौपानेको नेतृत्वमा ३ सदस्यीय छानविन समिति गठन गरेको थियो । समितिमा मन्त्रालयका उपसचिव समन्तमणी आचार्य र संघ संस्था विभागका प्रमुख डेमबहादुर बस्नेत रहेका थिए । मन्त्रालयले १० दिन भित्र छानविन प्रतिवेदन बुझाउन निर्देशन दिएको थियो ।

तर छानविन समितिले धेरै बिषयमा स्थलगत अध्ययन गर्नुपर्ने भएकाले करिब दुई हप्ता लगाएर प्रतिवेदन तयार पारेको हो ।

समितिले तयार पारेको प्रतिवेदनलाई मन्त्रालयले अख्तियार अनुसन्धान आयोगमा पठाएको हो । मन्त्रालय स्रोतका अनुसार अख्तियारले प्रतिवेदनको अध्ययन गरेर आवश्यक कदम अगाडी बढाउनेछ ।

एन्फा निर्वाचनमा व्यापक आर्थिक अनियमितता सहितको १४ बुँदे आरोप लगाउँदै चार जिल्ला फुटबल संघले अख्तियार, राखेप, मन्त्रालय लगायतका निकायमा उजुरी गरेका थिए ।

प्रधानमन्त्री केपी शर्मा ओलीले एन्फा विवादको बिषयमा बिशेष चासो राख्दै आवश्यक अनुसन्धान अघि बढाउन राखेप र खेलकुद मन्त्रालयलाई निर्देशन दिएका थिए ।
प्रधानमन्त्रीको निर्देशन लगत्तै राखेपले छानविन समिति गठन गरेको थियो । तर अख्तियारको निर्देशन अनुसार मन्त्रालय आफैले छानविन समिति गठन गरेको हो ।