काठमाडौं । सहिद स्मारक ए डिभिजन क्लब मनाङ मस्र्याङ्दी क्लबको अध्यक्षमा छिमि उर्गेन गुरुङ चुनिएका छन् । नेपाल साईकिलिङ संघको अध्यक्ष समेत रहेका छिमि नेपाली फुटबलको लोकप्रिय क्लब मनाङको अध्यक्षमा निर्वाचित भएका हुन् ।
यसअघि समेत अध्यक्षको रुपमा बिताईसकेका छिमि पुन क्लबको नेतृत्वमा फर्किएका हुन् ।
यस्तै, क्लबको १७ सदस्यीय कार्यसमितिमा उपाध्यक्षतर्फ रिन्जिन दोर्जे गुरुङ, कर्माछिरिङ गुरुङ, मुखिया लामा र टासी गुरुङ चयन भएका छन् । महासचिवमा अनिल गुरुङ, सचिवमा छिरिङ टासी घले, कोषाध्यक्षमा कान्छा गुरुङ, सह कोषाध्यक्षमा प्रेमबहादुर गुरुङ रहेका छन् । त्यस्तै, सदस्यमा छिरिङ गुरुङ, अमर गुरुङ, पेम्बा गुरुङ, सोनाम घले र मुखिया गुरुङ चयन भएका छन् ।
अन्य तीन जना सदस्यलाई अध्यक्षले मनोनित गर्ने क्लबका नवनियुक्त उपाध्यक्ष मुखिया लामाले खेलपाटीलाई बताए । क्लबको संरक्षक संस्था मनाङ सेवा समितिले शुक्रबार एक कार्यक्रमको आयोजना गरेर नयाँ कार्यसमितिलाई स्वागत गरेको छ ।
मनाङका नवनियुक्त अध्यक्ष छिमिले लिग विजेता क्लबलाई आसन्न एएफसी कपको तयारीमा लगाउने उद्वेश्य रहेको बताए । 'यसअघि समेत दुई कार्यकाल अध्यक्ष भईसकेको छु । मनाङ मात्र नभएर समग्र नेपाली फुटबललाई व्यवसायीक रुपमा अगाडी लैजाने मेरो कोशिश रहन्छ ।' उनले खेलपाटीसंग भने, 'फुटबललाई थप व्यवस्थित बनाउन मेरो नेतृत्वको कार्यसमितिले काम गर्नेछ ।'
