घोषणा गरिएको एक करोड ५६ लाख दिने सरकारको निर्णय

काठमाडौं । सरकारले विभिन्न समयमा खेलाडीले पदक जितेपछि घोषणा गरिएको एक करोड ५६ लाख रुपैयाँको पुरस्कार दिने निर्णय गरेको छ । मन्त्रीपरिषदको बैठकले फुटबल, क्रिकेट र शारिरिक सुगठन लगायतका खेलका पदकधारी खेलाडीलाई घोषणा गरिएको नगद पुरस्कार रकम दिने निर्णय गरेको हो ।

युएईविरुद्व एकदिवसीय र टी ट्वान्टी सिरिज, थाईल्याण्डमा भएको शारिरिक सुगठन प्रतियोगित र १२ औ सागमा फुटबलतर्फ स्वर्ण पदक जितेको पुरस्कार रकमको बिषयमा निर्णय गरिएको युवा तथा खेलकुद मन्त्री जगत विश्वकर्माले खेलपाटीलाई बताए ।

नेपालले यसै महिना युएईमा एकदिवसीय र टी ट्वान्टी सिरिज जितेको थियो । मन्त्रीपरिषद् बैठकले सिरिज विजेता खेलाडीलाई जनही ५ लाख दिने निर्णय गरेको थियो ।

मन्त्रीपरिषदले गरेको निर्णयमा मुख्य प्रशिक्षकलाई तीन लाख र अन्य अफिसियललाई २ लाख रुपैयाँ रहेको खेलकुदमन्त्री विश्वकर्माको भनाई छ ।

यस्तै, थाईल्याण्डमा भएको विश्व शारिरिक सुगठन प्रतियोगितमा विश्व विजेता बनेका महेश्वर महर्जनलाई समेत ५ लाख दिने सरकारले निर्णय गरेको छ । राखेपले महर्जनको सम्मानमा ७ लाख रुपैयाँ दिन मन्त्रालयलाई सिफारिस गरेको थियो । तर मन्त्रीपरिषदले ५ लाख रुपैयाँमात्र दिने निर्णय गरेको हो ।

यस्तै बैठकले १२ औ दक्षिण एसियाली खेलकुद प्रतियोगितामा फुटबलतर्फ स्वर्ण विजेता पुरुष टिमका खेलाडीको बाँकी रकम समेत दिने निर्णय गरेको छ ।

स्वर्ण विजेता खेलाडीलाई सरकारले ५ लाख रुपैयाँ दिने बताएको थियो । खेलाडीले पुरस्कारको दुई लाख पाएपनि तीन लाख रुपैयाँ अझैसम्म पाएका थिएनन् ।
फुटबल खेलाडीको बाँकी रहेको रकम दिने बिषयमा सरकारले निर्णय गरेको मन्त्री विश्वकर्माको भनाई छ ।