ब्राजिल भर्सेस नर्वे : दुई उत्कृष्ट स्ट्राइकरबीचको भिडन्त

ब्राजिल र नर्वेबीच हुने खेलदुई टोलीबीचको प्रतिस्पर्धा मात्र हुने छैन, विश्व फुटबलका दुई उत्कृष्ट स्ट्राइकरबीचको रोमाञ्चक भिडन्त पनि हुनेछ।

न्यूयोर्कको मेटलाइफ स्टेडियममा हुने यस खेलमा ब्राजिलका भिनिसियस जुनियर र नर्वेका एर्लिङ हालान्ड पहिलो पटक राष्ट्रिय टोलीको जर्सीमा आमनेसामने हुँदैछन्।

ब्राजिल र नर्वेबीचको समग्र हेड–टु–हेड तथ्यांक ब्राजिलका लागि धेरै सहज छैन। तर‚ भिनिसियसको उपस्थितिले ब्राजिल समर्थकलाई आशावादी बनाएको छ। कारण क्लब फुटबलमा हालान्डविरुद्धको व्यक्तिगत प्रतिस्पर्धामा भिनिसियसको प्रदर्शन उत्कृष्ट रहँदै आएको छ।

रियल मड्रिड र म्यानचेस्टर सिटीबीच पछिल्ला केही सिजनमा भएको च्याम्पियन्स लिगका खेलमार्फत यी दुई सुपरस्टार आठ पटक आमनेसामने भएका छन्।

ती आठ खेलमध्ये भिनिसियसले चार जित, दुई बराबरी र दुई हारको अनुभव गरेका छन्। यस अवधिमा उनले तीन गोल र पाँच असिस्ट गर्दै कुल आठ गोलमा प्रत्यक्ष योगदान दिएका छन्।

यता‚ हालान्डले रियलविरुद्ध चार गोल गरेका छन्। सन् २०२२–२३ को च्याम्पियन्स लिग सेमिफाइनलको पहिलो लेगमा सान्टियागो बेर्नाबेउमा १–१ को बराबरी हुँदा भिनिसियसले आकर्षक गोल गरेका थिए। तर‚ दोस्रो लेगमा म्यानचेस्टर सिटी ४–० ले विजयी हुँदै फाइनल पुगेको थियो। त्यस खेलमा भने हालान्ड गोल गर्न असफल भएका थिए।

त्यसपछिको सिजन क्वार्टरफाइनलमा फेरि भेट हुँदा रियल मड्रिडले पेनाल्टी सुटआउटमार्फत सिटीलाई बाहिरिएको थियो। त्यस चरणमा दुवै खेलाडीले गोल गर्न सकेनन्।

२०२४–२५ सिजनमा प्लेअफ चरणको पहिलो खेलमा म्यानचेस्टर सिटीले ३–२ को जित निकाल्दा हालान्डले दुई गोल गरेका थिए। त्यसपछि लिग चरणमा सिटीको २–१ को जितमा पनि उनले एक गोल थपेका थिए।

तर‚ २०२५–२६ सिजनको अन्तिम–१६ मा भने रियलले फेरि सिटीमाथि वर्चस्व जमायो। इतिहाद स्टेडियममा २–१ को जित निकाल्दा भिनिसियसले दुवै गोल गरे। हालान्डले सिटीका लागि एक गोल फर्काए पनि प्रशिक्षक पेप ग्वार्डिओलाको टोलीलाई प्रतियोगिताबाट बाहिरिनबाट जोगाउन सकेनन्।

दुवै खेलाडी अहिले प्रतियोगिताका शीर्ष गोलकर्ताको दौडमा पनि छन्। भिनिसियसले चार गोल गरेका छन् भने हालान्ड पाँच गोलसहित अघि छन्।

अन्तिम–१६ को यस महत्त्वपूर्ण भिडन्तपछि कसको गोल संख्या बढ्छ र कसको यात्रा यहीँ टुंगिन्छ भन्ने चासो सबैमा छ। निश्चित रूपमा विश्व फुटबलका यी दुई स्टारमध्ये एकको प्रतियोगिता यात्रा यही खेलपछि समाप्त हुनेछ।