मेसी बने एमएलएसमा सर्वाधिक पारिश्रमिक पाउने खेलाडी

काठमाडौं। मेजर लिग सकर (एमएलएस) का सबैभन्दा ठूलो स्टार लिओनल मेसी नै लिगका सर्वाधिक पारिश्रमिक पाउने खेलाडी बनेका छन्।

एमएलएस प्लेयर्स एसोसिएसनले मंगलबार सार्वजनिक गरेको विवरणअनुसार इन्टर मियामीका यो अर्जेन्टिनी सुपरस्टारको वार्षिक आधारभूत तलब २ करोड ५० लाख अमेरिकी डलर पुगेको छ। यो लिगकै दोस्रो उच्च पारिश्रमिक पाउने खेलाडीभन्दा दोब्बरभन्दा बढी हो।

सार्वजनिक गरिएको नयाँ तलब सूचीले गत अक्टोबरमा इन्टर मियामीसँग गरिएको नयाँ सम्झौतापछि मेसी सन् २०२८ सम्म क्लबमै रहने पनि पुष्टि गरेको छ। नयाँ सम्झौतापछि उनको आधारभूत तलब झन्डै दोब्बर बनेको हो। सबै सुविधा जोड्दा उनले कुल २ करोड ८३ लाख डलर सुनिश्चित रूपमा पाउनेछन्।

दोस्रो स्थानमा दक्षिण कोरियाली स्टार सन ह्युङ–मिन रहेका छन्। गत अगस्टमा लस एन्जलस एफसीमा आबद्ध भएका उनले यसअघि टोटनह्यामको कप्तानी सम्हालेका थिए। उनको आधारभूत तलब १ करोड ३ लाख ६० हजार डलर रहेको छ भने कुल सुनिश्चित पारिश्रमिक १ करोड १२ लाख डलर पुगेको छ। उनलाई टोलीमा भित्र्याउन एलएएफसीले एमएलएस इतिहासकै कीर्तिमानी २ करोड ६० लाख डलर ट्रान्सफर शुल्क खर्च गरेको बताइएको छ।

यो तलब विवरणमा प्रायोजन तथा विज्ञापनबाट प्राप्त आम्दानी समावेश गरिएको छैन। साथै मेसीलाई इन्टर मियामीको स्वामित्वमा हिस्सा खरिद गर्ने अवसर पनि दिइएको छ। यो यस सूचीमा गणना गरिएको छैन। क्लबका सह–मालिक इंग्ल्यान्डका पूर्वस्टार डेभिड बेकह्याम हुन्।

३८ वर्षीय मेसीले एमएलएस नियमित सिजनमा मियामीका लागि ६४ खेल खेल्दै ५९ गोल गरिसकेका छन्। गत सिजन उनले २९ गोल गर्दै लिगकै सर्वाधिक गोलकर्ता बनेका थिए र लगातार दोस्रो पटक एमभीपी अवार्ड जितेका थिए।

मेसीकै क्लब तथा अर्जेन्टिनाका टोलीसाथी रोड्रिगो डी पउल पारिश्रमिक सूचीको तेस्रो स्थानमा छन्। उनको सुनिश्चित आम्दानी ९७ लाख डलर रहेको छ। चौथो स्थानमा मेक्सिकोका हिर्भिङ लोजानो छन्, जसलाई ‘चाकी’ नामले पनि चिनिन्छ। उनको सुनिश्चित आम्दानी ९३ लाख डलर छ। यद्यपि गत नोभेम्बरयता उनले सान डिएगो एफसीका लागि मैदान उत्रिएका छैनन्।

शीर्ष पाँचको अन्तिम स्थानमा मिगुएल अल्मिरोन छन्। एटलान्टा युनाइटेडका यी मिडफिल्डरले कुल ७९ लाख डलर सुनिश्चित पारिश्रमिक पाउनेछन्। एमएलएसका सबै खेलाडीको कुल पारिश्रमिक रकम ६३ करोड १० लाख डलर पुगेको बताइएको छ।