मिलिताओले विश्वकप गुमाउने

काठमाडौं। ब्राजिल तथा रियल म्याड्रिडका डिफेन्डर एदर मिलिताओले विश्वकप गुमाउने लगभग निश्चित भएको छ। उनले मंगलबार ह्यामस्ट्रिङ समस्याको शल्यक्रिया गराएका थिए।

स्पेनिस सञ्चारमाध्यमका अनुसार यस्ता शल्यक्रियाबाट निको हुन कम्तीमा केही महिना लाग्ने गर्छ। ब्राजिलले सात हप्ताभन्दा कम समयमा आफ्नो विश्वकप यात्रा सुरु गर्नेछ।

गत साता ला लिगामा अलाभेसमाथि २–१ को जित हासिल गर्ने क्रममा मिलिताओ घाइते भएका थिए। रियलले जनाएअनुसार सेन्ट्रल डिफेन्डरको बाँया खुट्टाको बाइसेप्स फेमोरिस मांसपेशीको नजिकको टेन्डन च्यातिएको छ।

‘मिलिताओले आउने दिनमा रिह्याबको प्रक्रिया सुरु गर्नेछन्,’ रियलले भनेको छ। तर, उनी कहिले फर्किनेछन् भन्ने समयसीमा दिएको छैन। २८ वर्षीय ब्राजिली अन्तर्राष्ट्रिय खेलाडी आफ्नो करिअरभरि चोटबाट प्रभावित हुँदै आएका छन्। यसमा गम्भीर घुँडाको समस्या पनि समावेश छ।