उपाधितर्फ अझ नजिक इन्टर

काठमाडौं। इन्टर मिलान आइतबार सिरी ‘ए’ उपाधितर्फ अझ नजिक पुगेको छ। तर, टोरिनोसँग २–२ को बराबरी खेल्दै दुई गोलको अग्रता गुमाउँदा उसले आफैंलाई केही कठिन अवस्थामा पुर्‍याएको थियो।

यस नतिजापछि इन्टर दोस्रो स्थानको नापोलीभन्दा १० अंकले अगाडि रह्यो। अब सिजनका चार खेल मात्र बाँकी छन्। यदि इन्टरले यो खेल जितेको भए अर्को साताको खेलमा पार्माविरुद्ध हार टार्न सके मात्र पनि उसले उपाधि सुनिश्चित गर्न सक्थ्यो। त्यो चाहे नापोली वा एसी मिलानको नतिजा जस्तोसुकै भए पनि।

युभेन्टससँग गोलरहित बराबरी खेलेपछि एसी मिलान सहरी प्रतिद्वन्द्वी इन्टरभन्दा १२ अंकले पछाडि परेको छ। इन्टरका लागि मार्कुस थुरामले २३औं मिनेटमा फेडेरिको डिमार्कोको उत्कृष्ट क्रसमा हेडरमार्फत गोल गर्दै टोलीलाई अग्रता दिलाएका थिए।

यो डिमार्कोको यस सिजनको १७औं असिस्ट थियो। योसँगै उनले सिरी ‘ए’ को एकै सिजनमा सबैभन्दा धेरै असिस्ट गर्ने कीर्तिमान तोडेका छन्। २८ वर्षीय डिमार्कोले दोस्रो हाफमा अर्को योगदान दिँदै बायाँतर्फबाट गरेको कर्नरलाई यान बिसेकले हेडरमार्फत पोस्टको भित्री भाग हुँदै गोलमा परिणत गरे।

इन्टर सहज जिततर्फ अग्रसर देखिएको अवस्थामा ७०औं मिनेटमा जियोभानी सिमेओनेले टोरिनोका लागि उत्कृष्ट गोल फर्काए। उनले ब्याकहिल पासमार्फत इमिरहान इल्खानलाई बल दिएका थिए र त्यसपछि फर्किएको पासलाई समात्दै गोलकिपर यान सोमरमाथि चिप गर्दै गोल गरेका थिए।

७९औं मिनेटमा डुभान जापाटाको हेडर इन्टरका डिफेन्डर कार्लोस अगस्तोको हातमा लागेपछि पेनाल्टी दिइयो। यसलाई निकोला भ्लासिचले माथिल्लो बायाँ कुनामा प्रहार गर्दै टोरिनोलाई बराबरीमा पुर्‍याए।