अझै नयाँ घरेलु मैदानमा पहिलो जितको प्रतीक्षामा मियामी

काठमाडौं। लिओनल मेसी र इन्टर मियामी अझै पनि आफ्नो नयाँ घरेलु मैदानमा पहिलो जितको प्रतीक्षामा छन्।

जर्मान बेरतेरामेले ७६औं मिनेटमा रिबाउन्डबाट गोल गरेपछि इन्टर मियामीले न्यू इङ्गल्यान्ड रिभोलुसनसँग १–१ को बराबरी खेलेको छ। यससँगै एमएलएस कपका साबिक विजेता इन्टर मियामी नयाँ रंगशालामा तीन खेलमा जितविहीन (०–०–३) बनेको छ। यस सिजन भने उनीहरूले बाहिरका खेलमा ५–१–१ को राम्रो प्रदर्शन गरेका छन्।

इन्टर मियामी अहिले आफ्नो पछिल्ला ९ एमएलएस खेलमा अपराजित (५–०–४) रहेको छ, जुन सिजनको सुरुआतमा एलएएफसीसँग हारपछि सम्भव भएको हो। सबै प्रतियोगिता जोड्दा टोली पछिल्ला ११ खेलमा (५–०–६) अपराजित छ।

न्यू इङ्गल्यान्डका पूर्व एमएलएस एमभीपी कार्लेस गिलले ५६औं मिनेटमा गोल गर्दै टोलीलाई अग्रता दिलाएका थिए। विल स्यान्ड्सको लामो थ्रो–इन डोर टुर्गेमानले नियन्त्रणमा लिएपछि गिलले सहजै बल पाए र इन्टर मियामीका गोलरक्षक डेन सेन्ट क्लेयरलाई छक्याउँदै चिप प्रहारमार्फत गोल गरे।

त्यसको केही मिनेटअघि इन्टर मियामीले अग्रता लिएको जस्तो देखिएको थियो, तर तादेओ आलेन्देको प्रहार अफसाइडका कारण रद्द गरियो।

करिब २० मिनेटपछि इन्टर मियामीले खेल बराबरी गर्‍यो। लुइस सुआरेजले गोलनजिकैबाट प्रहार गर्दा न्यू इङ्गल्यान्डका गोलरक्षक म्याट टर्नरले बचाउ गरे। तर, बल उनको हातबाट रिबाउन्ड भएर बेरतेरामेसम्म पुग्यो र उनले सजिलै गोल गर्दै खेल १–१ बनाए।

यो गोल नभएको भए न्यू इङ्गल्यान्डले २०२३ जुन १० पछि इन्टर मियामीमाथि पहिलो जित निकाल्ने सम्भावना थियो। त्यही समयतिर मेसीले एमएलएसमा आउने र इन्टर मियामीमा आबद्ध हुने घोषणा गरेर फुटबल जगतलाई चकित पारेका थिए।

त्यसयता इन्टर मियामीले न्यू इङ्गल्यान्डसँगका चार खेलमा १६–५ को गोलअन्तरले सबै खेल जितेको थियो। अब इन्टर मियामीसँग फिफा विश्वकपका लागि एमएलएसको सात हप्ते विश्रामअघि पाँच खेल बाँकी छ।