डिफेन्डिङ च्याम्पियन एनआरटीलाई हराउँदै मछिन्द्रले जित्यो उपाधि

इलाम। मछिन्द्र क्लबले तेस्रो इलाम गोल्डकपको उपाधि जितेको छ। डिफेन्डिङ च्याम्पियन न्युरोड टिम (एनआरटी) लाई २–० ले हराउँदै मछिन्द्रले उपाधि जितेको हो।

उपाधिसँगै मछिन्द्रले नगद १० लाख रुपैयाँ प्राप्त गरेको छ। उपविजेता एनआरटीले नगद ५ लाख रुपैयाँ प्राप्त गरेको छ। मछिन्द्रको जितमा सौरभ सुब्बा र मिलन चाम्लिङले गोल गरे।

मछिन्द्रले इलाम गोल्डकपको दोस्रो सहभागितामा उपाधि जितेको हो। न्युरोड टिमले इलाम गोल्डकपमा पहिलो पटक उपाधि जित्न असफल भएको हो। यसअघि पहिलो संस्करणमा विर्तामोड युनाइटेड र दोस्रो संस्करणमा लिग च्याम्पियन चर्च बोइजलाई हराउँदै उपाधि जितेको थियो। मछिन्द्र यसअघि क्वार्टरफाइनलमा रेडस्टार झापासंग पराजित बन्दै बाहिरिको थियो।

फाइनल खेलको म्यान अफ द म्याच मछिन्द्रका प्रदीप बुढाथोकी घोषित हुँदै नगद रु ८ हजार १ सय प्राप्त गरे। व्यक्तिगत विधातर्फ मछिन्द्रको वर्चस्व रहयो। उत्कृष्ट गोलरक्षक प्रदीप भण्डारी, उत्कृष्ट मिडफिल्डर युवराज ढकाल, सर्वाधिक गोलकर्ता मिलन चाम्लिङ र उत्कृष्ट प्रशिक्षक प्रवेश कटुवाल घोषित भए।

उत्कृष्ट डिफेन्डर एनआरटीका आशिष गुरुङ घोषित भए। उनीहरूले जनही १५ हजारसहित ट्रफी प्राप्त गरे। उदीयमान खेलाडी रेडहर्सका विवेक सुनाम घोषित भए। उनले २५ हजारसहित ट्रफी पाए। प्रतियोगिताको सर्वोत्कृष्ट खेलाडी मछिन्द्रका सनिस श्रेष्ठ घोषित हुँदै ५१ हजारसहित ट्रफी प्राप्त गरे।