सौराको ह्याट्रिकसँगै फेयर एफसी फाइनलमा

बिर्तामोड। सौरा राउतको उत्कृष्ट ह्याट्रिकको मद्दतमा धरानको फेयर एफसी चौथो बुट्टाबारी गोल्डकप नकआउट फुटबल प्रतियोगिताको फाइनलमा प्रवेश गरेको छ।

बिर्तामोड–६ स्थित हरियाली खेल मैदानमा बिहीबार सम्पन्न दोस्रो सेमिफाइनलमा मोरङको बेलबारी फुटबल क्लबलाई ३–१ ले पराजित गर्दै फेयरले फाइनल यात्रा तय गरेको हो।

जितसँगै फेयर एफसीले कम्तीमा १ लाख ११ हजार १ सय ११ रुपैयाँ सुनिश्चित गरेको छ भने बेलबारी फुटबल क्लब प्रतियोगिताबाट बाहिरिँदै खालीहात फर्किएको छ।

अब वैशाख १२ गते हुने फाइनलमा फेयर एफसीले आयोजक बुट्टाबारी युनाइटेडसँग प्रतिस्पर्धा गर्नेछ। खेल दिउँसो २ बजेबाट सुरु हुने आयोजकले जनाएको छ।

खेलको सुरुआत भने बेलबारीका लागि उत्साहजनक रह्यो। १०औं मिनेटमै सञ्जय धिमालले गोल गर्दै टिमलाई १–० को अग्रता दिलाएका थिए। प्रारम्भिक दबाब बनाएको बेलबारीले केही समय खेल नियन्त्रणमा राखे पनि त्यसपछि खेलको लय फेयरतर्फ मोडियो।

३४औं मिनेटमा सौराले बराबरी गोल फर्काउँदै खेललाई १–१ को स्थितिमा ल्याए। त्यसपछि उनले ३८औं मिनेटमा दोस्रो गोल थपे। पहिलो हाफको अतिरिक्त समयमा पुनः गोल गर्दै राउतले व्यक्तिगत ह्याट्रिक पूरा गरे र टोलीलाई ३–१ को सुरक्षित अग्रता दिलाए।

दोस्रो हाफमा दुवै टोलीबाट थप गोल हुन सकेन। बेलबारीले खेलमा फर्कने प्रयास गरे पनि फेयरका रक्षापंक्ति र गोलरक्षकको सशक्त प्रदर्शनका कारण सफल हुन सकेन।

ह्याट्रिक नायक सौरा राउत खेलको ‘प्लेयर अफ दि म्याच’ घोषित भए। उनले नगद ३ हजार रुपैयाँसहित ट्रफी प्राप्त गरे।