आर्सनल र सिटी उपाधि होडको निर्णायक मोडमा
काठमाडौं। प्रिमियर लिगको उपाधि दौड निर्णायक मोडमा पुगेको छ। यही बीचमा शीर्ष दुई टोली आर्सनल र म्यानचेस्टर सिटी आइतबार आमनेसामने हुँदैछन्।
यो खेलमा आर्सनल विजयी भएमा उसले लामो समयदेखि अग्रता बनाइरहेको सिटीसँगको दूरी ९ अंक पुर्याउनेछ। योसँगै आर्सनल सन् २००४ पछि पहिलो पटक इङ्ल्यान्डको च्याम्पियन बन्ने अबसर पाउने छ।
यदि सिटीले जित्यो भने अंक दूरी तीन अंकमा झर्नेछ। सिटीसँग अझै एक खेल बाँकी रहनेछ, जुन उसले बर्नलीविरुद्ध खेल्नेछ। त्यसपछि दुवै टोलीका पाँच–पाँच खेल बाँकी रहनेछन्। यदि खेल बराबरीमा सकियो भने आर्सनलका लागि बढी फाइदाजनक हुनेछ। किनकि उसले सिटीसँगको दूरी ६ अंकमा कायम राख्नेछ।
सिटी घरेलु मैदानमा उत्कृष्ट लयमा छ। उसले पछिल्ला तीन खेल जितेको छ। इङ्लिस लिग कप फाइनलमा आर्सनललाई २–०, एफए कप क्वार्टरफाइनलमा लिभरपुललाई ४–० र लिगमा चेल्सीलाई लिग ३–० ले पराजित गरेको छ।
सिटीका फ्रान्सेली मिडफिल्डर रायान चेर्की उत्कृष्ट फर्ममा छन्। अर्कोतर्फ आर्सनल पछिल्ला पाँचमध्ये तीन खेलमा पराजित हुँदै सिजनको अन्त्यतिर संघर्ष गरिरहेको छ। यद्यपि, उसले अझै प्रिमियर लिग र च्याम्पियन्स लिग दुवै उपाधि जित्ने सम्भावना कायम राखेको छ।
सिटी–आर्सनल खेलअघि एभर्टन र लिभरपुलबीच मर्सीसाइड डर्बी हुनेछ। साथै एस्टन भिल्ला र सन्डरल्यान्ड तथा नटिङ्घम फरेस्ट र बर्नलीबीच पनि खेल हुनेछन्।
