अपराजित रहँदै आर्मी च्याम्पियन

काठमाडौं। त्रिभुवन आर्मी क्लबले अपराजित रहँदै प्रधानमन्त्री कप एकदिवसीय क्रिकेट प्रतियोगिता जितेको छ।

शुक्रबार सम्पन्न खेलमा पहिलोपल्ट फाइनल पुगेको सुदूरपश्चिम प्रदेशलाई ५ विकेटले पराजित गरेको हो। आर्मीको यो तेस्रो उपाधि हो।

यसअघि आर्मी २०१७ को पहिलो संस्करणमा पुलिससँग संयुक्त विजेता घोषित भएको थियो। त्यसपछि २०२१ मा उपाधि उचालेको आर्मीले करिब ५ वर्षपछि सोही इतिहास दोहोर्‍याएको हो।

सुदूरपश्चिमले दिएको १६१ रनको सामान्य लक्ष्य आर्मीले ३४.५ ओभरमा ५ विकेट गुमाउँदै पूरा गर्‍यो।

आर्मीका इमान शेखले अविजित रहँदै सर्वाधिक ४६ रन बनाए। बसीर अहमदले ४५ रनको योगदान दिए।

त्रितराज दास ३१ र कुशल मल्ल १७ रनमा आउट भए। सुदूरपश्चिमका हेमन्त धामीले दुई विकेट लिए।