नाइजेरियालाई पराजित गर्दै युवा समाज सेमिफाइनलमा

सुनसरी। जस्ट जोन एफसी नाइजेरियालाई ३–२ ले पराजित गर्दै युवा समाज मोरङ १६औं संस्करणको अन्तर्राष्ट्रिय आमन्त्रण इटहरी गोल्डकप फुटबल प्रतियोगिताको सेमिफाइनलमा प्रवेश गरेको छ।

रात्रिकालीन प्रतियोगिताअन्तर्गत सोमबार सम्पन्न उद्घाटन खेलमा मोरङको जितमा श्रीजन गौतम, सुजन डंगोल र दोर्जे तामाङले एक–एक गोल गरे। खेलको चौथो मिनेटमै श्रीजनले गोल गर्दै मोरङलाई अग्रता दिलाएका थिए। विपक्षी डिफेन्डर तायो एक्किरिन्ससोयबाट रिबाउण्ड भएको बललाई उनले जाली चुमाएका हुन्।

३५औं मिनेटमा डिबोला हामजामले गोल गर्दै खेल १–१ को बराबरीमा ल्याए। डेबिड ओलवोको फ्रिकिक मोरङका गोलकिपर प्रमञ्जय गच्छदारले नियन्त्रण गर्न नसक्दा आएको रिबाउण्ड बललाई हामजामले सदुपयोग गरेका थिए। पहिलो हाफ १–१ को बराबरीमा सकिएको थियो।

दोस्रो हाफको ३८औं मिनेटमा सुजन डंगोलले उत्कृष्ट गोल गर्दै मोरङलाई पुनः अग्रता दिलाए। त्यसपछि ४२औं मिनेटमा दोर्जे तामाङले गोल थपेपछि खेल ३–१ को अवस्थामा पुगेको थियो।

खेलको अन्त्यतिर थपिएको पाँच मिनेटको अतिरिक्त समयमा एडिगन पिटरले एक गोल फर्काए पनि नाइजेरियन टोलीलाई हारबाट जोगाउन पर्याप्त भएन।

खेलको ‘प्लेयर अफ द म्याच’ दोर्जे तामाङ घोषित भए। उनले नगद १० हजार रुपैयाँ प्राप्त गरे।