साफ महिला च्याम्पियनसिप खेल्न भारत नजाने भयो पाकिस्तान

काठमाडौं। पाकिस्तान महिला फुटबल टोलीले भारतमा आयोजना हुन लागेको साफ महिला च्याम्पियनसिपबाट नाम फिर्ता लिएको छ।

द टाइम्स अफ इन्डियाको रिपोर्टअनुसार दुई देशबीच जारी राजनीतिक तनावका कारण पाकिस्तानले प्रतियोगितामा सहभागी नहुने निर्णय गरेको हो।

अब प्रतियोगिता ६ टोली मात्रै सहभागी हुनेछन्। यसअघि दक्षिण एसियाली फुटबल महासंघ (साफ) ले सातै सदस्य राष्ट्रको सहभागिता रहने जनाएको थियो। साफले यस प्रतियोगितालाई दक्षिण एसियाको मुख्य महिला फुटबल प्रतियोगितामध्ये एक बनाउने लक्ष्य राखेको थियो।

रिपोर्टअनुसार ३० मार्चमा अन्तिम म्याद सकिए पनि पाकिस्तानले सहभागिताको पुष्टि नगरेको बताइएको छ। एक वरिष्ठ अधिकारीका अनुसार पाकिस्तान सरकार टोलीलाई भारत पठाउन इच्छुक देखिएको छैन।

साफ महिला च्याम्पियनसिप २५ मेदेखि ७ जुनसम्म भारतको गोवामा आयोजना हुनेछ। भारत–पाकिस्तानबीचको खेलकुद सम्बन्ध लामो समयदेखि तनावपूर्ण रहँदै आएको छ। अन्तर्राष्ट्रिय क्रिकेट परिषद् (आईसीसी)ले आयोजना गर्ने टी–२० विश्वकपमा पनि दुवै देशबीच खेल आयोजना सम्बन्धी विवाद देखिएको थियो।

अब प्रतियोगितामा साबिक विजेता बंगलादेशसँगै उपविजेता नेपाल, भारत, भुटान, श्रीलंक र माल्दिभ्स सहभागी हुनेछन्। बंगलादेश र भारत दुवै टोलीले हालै एएफसी महिला एसियन कपमा पनि खेलेका थिए।

नेपाल छनोटनजिक पुगे पनि उज्बेकिस्तानविरुद्ध पेनाल्टी सुटआउटमा पराजित भएको थियो। साफ महिला च्याम्पियनसिपको इतिहासमा भारत सबैभन्दा सफल टोली हो।

यो टोलीले पाँच पटक उपाधि जितेको छ। पछिल्ला दुई संस्करण (२०२२ र २०२४) भने बंगलादेशले जित्दै आफ्नो वर्चस्व कायम गरेको छ। २०२४ को फाइनलमा बंगलादेशले दशरथ रंगशालामा नेपाललाई २–१ ले पराजित गरेको थियो।