लिभरपुललाई हराउँदै सिटी सेमिफाइनलमा

काठमाडौं। एर्लिङ हालान्डको १८ मिनेटमा ह्याट्रिक गरेसँगै म्यानचेस्टर सिटी शनिबार लगातार आठौं सिजन एफए कपको सेमिफाइनलमा पुगेको छ।

मोहम्मद सलाहले पेनाल्टी मिस गर्दा लिभरपुलको समस्या झन् बढ्यो। इतिहाद स्टेडियममा भएको ४–० को हारले दबाबमा रहेका प्रशिक्षक आर्ने स्लटमाथि थप दबाब सिर्जना गरेको छ।

हालान्डले ३९औं मिनेटमा पेनाल्टीमार्फत गोल गर्दै सिटीलाई राम्रो सुरुआत दिलाए। पहिलो हाफको अतिरिक्त समयमा एन्टोइन सेमेन्योको क्रसलाई हेडरमार्फत गोलमा परिणत गरे।

त्यसपछि ५७औं मिनेटमा क्रसबारबाट फर्किएको बललाई गोल गर्दै उनले सिटीका लागि यस सिजनको पहिलो र सन् २०२२ मा क्लबमा आबद्ध भएयता १२औं ह्याट्रिक पूरा गरे।

सेमेन्योले ५०औं मिनेटमा अर्को गोल थपे। दुई हप्ता अघि वेम्ब्ली स्टेडियममा आर्सनललाई हराउँदै इङ्लिस लिग कप जितेको सिटीका लागि यो त्यसपछि पहिलो खेल थियो। एफए कप सेमिफाइनलका लागि सिटी यही महिना फेरि वेम्ब्ली फर्किनेछ।

हालैको अन्तर्राष्ट्रिय विश्राममा ९ वर्षपछि लिभरपुल छोड्ने घोषणा गरेका सलाहले आफ्नो बिदाइ यात्रा सुरु गरे पनि गोल गर्न सकेनन्। उनले पाएका थुप्रै अवसरमध्ये उत्कृष्ट अवसर ६४औं मिनेटमा पाएको पेनाल्टी थियो। तर, सिटीका गोलकिपर जेम्स ट्राफोर्डले उत्कृष्ट बचाउ गर्दै त्यसलाई रोकिदिए।

सन् २०१७ देखि एफए कपमा सिटीको घरेलु मैदानमा यो लगातार १८औं जित हो। पेप ग्वार्डिओलाको टोलीले लगातार सात पटक एफए कप फाइनल पुग्ने क्लाफाम रोभर्सको कीर्तिमान बराबरी गरेको थियो। तर, अब त्यो कीर्तिमान एक्लै आफ्नो नाममा राखेको छ।

अन्य खेलमा शनिबार चेल्सीले तेस्रो डिभिजनको पोर्ट भेलसँग खेल्दैछ भने आर्सनल दोस्रो डिभिजनको साउथह्याम्प्टनको मैदानमा उत्रिनेछ।

सेमिफाइनलको ‘ड्र’ आइतबार हुनेछ। अन्तिम क्वार्टरफाइनल खेलमा वेस्ट ह्यामले लिड्स युनाइटेडलाई आतिथ्य दिनेछ।