लेवान्डोव्स्कीले अन्तर्राष्ट्रिय फुटबलबाट सन्न्यास लिने दिए संकेत

काठमाडौं। पोल्यान्डका कप्तान रोबर्ट लेवान्डोव्स्कीले अन्तर्राष्ट्रिय फुटबलबाट सन्न्यास लिने संकेत दिएका छन्। टोली २०२६ विश्वकपका लागि छनोट हुन असफल भएको छ।

यससँगै पोल्यान्डका सर्वाधिक गोलकर्ताको युग समाप्त हुने सम्भावना देखिएको छ। ३७ वर्षीय स्ट्राइकर स्विडेनसँग ३–२ को हार बेहोरेपछि निकै निराश देखिएका थिए।

यो हारसँगै पोल्यान्ड विश्वकपबाट बाहिरियो। स्टकहोममा भएको उक्त प्लेअफ फाइनलको अन्तिम सिट्टी बजेसँगै पोल्यान्डको यात्रा टुंगिएको थियो। हारको केही घण्टापछि लेवान्डोव्स्कीले सामाजिक सञ्जालमा आफू मैदान छोड्दै गरेको तस्बिर सेयर गरेका थिए।

उक्त तस्बिरमा सारा ब्राइटम्यान र आन्द्रेआ बोसेलीको गीत ‘टाइम टु से गुडबाय’ राखिएको थियो। यसले उनको अन्तर्राष्ट्रिय सन्न्यासको संकेत दिएको रूपमा व्याख्या गरिएको थियो।

बार्सिलोना क्लबका स्ट्राइकर लेवान्डोव्स्कीले अगस्टमा पूर्वप्रशिक्षक मिखाल प्रोबिर्जसँगको विवादपछि टोलीमा फर्किएका थिए। तर, विश्वकपमा स्थान बनाउन नसक्दा उनको लामो र कीर्तिमानी अन्तर्राष्ट्रिय करिअर ठूलो खेलबिना अन्त्य हुनसक्ने देखिएको छ।

तर, खेलपछि उनले सामाजिक सञ्जाल पोस्टलाई ठूलो अर्थ नदिन आग्रह गरेका छन्। अन्तिम निर्णय अझै नलिएको उनले बताए। उनले भने,‘म अहिले कुनै निर्णय दिने अवस्थामा छैन। म आफ्नो क्लबमा फर्किन्छु, अझै केही खेल बाँकी छन्। मेरो मनमा उठेका प्रश्नहरूको उत्तर मैले आफैं खोज्नुपर्छ।’

अर्को विश्वकप चार वर्षपछि हुने भएकाले यो हार वार्सामा जन्मिएका यी फरवार्डका लागि निकै पीडादायक बनेको छ। उनले सन् २००८ मा डेब्यु गरेदेखि टोलीलाई नेतृत्व गर्दै आएका छन् र २०१४ देखि कप्तानको जिम्मेवारी सम्हालिरहेका छन्।

उनले पोल्यान्डका लागि १६५ खेलमा ८९ गोल गर्दै कीर्तिमान कायम गरेका छन्। यसअघि उनले भनेका थिए,‘मेरो करिअर अगाडि बढ्दै जाँदा म केही क्षणहरूलाई अझ बढी मूल्य दिन थाल्छु। म करिअर अन्त्य गर्न डराउँदिन, किनकि म त्यसका लागि तयार हुँदैछु। मलाई थाहा छ यो मेरो जीवनको महत्त्वपूर्ण हिस्सा हो, तर सबैथोक होइन।’