नेपाललाई हराउन जुनसुकै स्तरमा जान तयार बंगलादेश

काठमाडौं। बंगलादेशले साफ यु–२० च्याम्पियनसिपको सेमिफाइनलमा नेपालविरुद्ध बुधबार माल्दिभ्समा हुने खेलअघि कुनै पनि चुनौती सामना गर्न तयार रहेको जनाएको छ।

मुख्य प्रशिक्षक मार्क कोक्सले आफ्नो टोली फाइनल पुग्नेमा विश्वस्त रहेको बताउँदै पेनाल्टी सुटआउटसम्म सामना गर्न तयार रहेको जानकारी दिएका हुन्।

‘हामी जोसँग खेले पनि त्यो संघर्षपूर्ण हुनेछ। तर, हामी आफ्नै शैलीमा खेल्नेछौं र आफूमा ध्यान दिनेछौं,’ कोक्सले मंगलबार बंगलादेश फुटबल महासंघले सार्वजनिक गरेको भिडियो अन्तर्वार्तामा भने।

उनले थपे,‘हामी ९० मिनेटभित्रै जित निकाल्नेछौं भन्नेमा आशा छ। प्रतियोगितामा अतिरिक्त समय छैन, खेल सिधै पेनाल्टीमा जान्छ। हामी सबै अवस्थाका लागि तयार छौं।’

बंगलादेशले प्रतियोगिताको सुरुआत पाकिस्तानलाई २–० ले हराउँदै गरेको थियो भने भारतसँग १–१ को बराबरी खेलेको थियो। समूहमा दोस्रो हुँदै बंगलादेश समूह ‘बी’बाट सेमिफाइनलमा पुगेको हो। नेपालले भने समूह ‘ए’मा भुटानलाई २–१ र श्रीलंकालाई १–० ले हराएको हो।

आयोजक माल्दिभ्ससँग भने १–१ को बराबरी खेलेको थियो। योसँगै यी दुई टोली भिड्ने पक्का भएको हो। सन् २०२४ मा उपाधि जित्ने क्रममा बंगलादेशले नेपाललाई ४–१ ले हराएको थियो।

यो उमेर समूहमा बंगलादेशले जितेको एकमात्र उपाधि हो। रोनान डेक्लानको उत्कृष्ट प्रदर्शन र गोलका बाबजुद बंगलादेशको खेल अहिलेसम्म केही अस्थिर देखिएको छ।

टोली छनोट र खेल शैलीलाई लिएर प्रशिक्षक कोक्सले आलोचना पनि सामना गर्नुपरेको छ। तर, महत्त्वपूर्ण खेलअघि उनले आफ्नो रणनीतिबारे धेरै खुलाउन चाहेनन्।

‘हामीसँग रहेका २२ खेलाडीमध्ये प्रत्येकमाथि मलाई पूर्ण विश्वास छ। खेलको अवस्थाअनुसार हामी सबै विकल्प विचार गर्नेछौं,’ कोक्सले भने।

उक्त खेल ३:४५ बजे सुरु हुनेछ। त्यसपछि दिनको दोस्रो सेमिफाइनलमा भारत र भुटानबीच प्रतिस्पर्धा हुनेछ।