राफिन्हाले एट्लेटिकोविरुद्धको च्याम्पियन्स लिगको खेल गुमाउने

काठमाडौं। स्पेनिस क्लब बार्सिलोनाका फरवार्ड राफिन्हा करिब पाँच हप्ता मैदानबाहिर रहने भएका छन्। फ्रान्स विरुद्धको मैत्रीपूर्ण खेल खेल्दा उनको दाहिने ह्यामस्ट्रिङमा चोट लागेको हो।

यसका कारण उनले यूईएफए च्याम्पियन्स लिगको क्वार्टरफाइनलमा एट्लेटिको मड्रिडविरुद्ध हुने दुवै खेल गुमाउनेछन्।

ब्राजिलको फुटबल महासंघले गरेको स्वास्थ्य परीक्षणपछि राफिन्हालाई दाहिने ह्यामस्ट्रिङमा चोट लागेको पुष्टि भएको क्लबले जनाएको छ। खेलका क्रममा असहज महसुस गरेपछि उनलाई परीक्षण गरिएको थियो। अहिले उनी उपचारका लागि बार्सिलोना फर्किँदै छन्। उनी निको हुन करिब पाँच हप्ता लाग्ने अनुमान गरिएको छ।

२९ वर्षीय राफिन्हाले च्याम्पियन्स लिगको अन्तिम १६ को दोस्रो लेगमा न्युक्यासल युनाइटेडविरुद्ध ७–२ को सानदार जितमा दुई गोल गरेका थिए। तर, अब उनी अप्रिल ८ मा बार्सिलोनामा हुने पहिलो लेगसहित एट्लेटिको मड्रिडविरुद्धका दुवै खेलमा अनुपस्थित रहनेछन्।

यसबीच फ्रान्सले ब्राजिललाई २–१ ले हराएको थियो। एफसी बार्सिलोना हाल ला लिगा को शीर्षस्थानमा छ। दोस्रो स्थानको रियल मड्रिड भन्दा चार अंकले अगाडि छ। प्रतियोगितामा अब नौ चरणका खेल बाँकी छन्।

पाँच पटकको विश्व च्याम्पियन ब्राजिलले जुन १३ मा मोरक्कोविरुद्ध खेल्दै विश्वकप अभियान सुरु गर्ने तालिका छ।