कुमारको प्यानल एन्फा निर्वाचनमा सहभागी नहुने

काठमाडौं । दीर्घबहादुर केसी (कुमार) सहितको प्यानलले अखिल नेपाल फुटबल संघ एन्फाको आसन्न निर्वाचनमा सहभागी नहुने भएको छ । एन्फाको आसन्न निर्वाचनमा अध्यक्ष पदमा उम्मेदवारी दिएका केसी सहितको प्यानल चुनावी प्रकृयाबाट अलग हुने तयारी गरेको हो ।

खेलकुदको कार्यकारी निकाय राष्ट्रिय खेलकुद परिषद्ले निर्वाचन स्थगित गर्न दिएको निर्देशन बेवास्ता गरेको भन्दै एन्फालाई तीन महिनाका लागि निलम्बनको निर्णय गरेको छ । विधि, विधान अनुसार तहगत रुपमा निर्वाचन गर्न परिषद्ले दिएको निर्देशनलाई बेवास्ता गर्दै एन्फाको वर्तमान नेतृत्वले चैत १३ गते झापामा केन्द्रिय निर्वाचन गर्न लागेको छ ।

पटक पटकको निर्देशनलाई अवज्ञा गरेको भन्दै स्पष्टिकरण सोधेको परिषद्ले चित्त बुझ्दो जवाफ नपाएको भन्दै बिहीबार संघ निलम्बनको निर्णय गरेको हो ।

पुन एन्फाको नेतृत्व कब्जा गर्ने नियतका साथ वर्तमान नेतृत्वले पुरानै मतदाता बटुलेर निर्वाचन प्रकृया अघि बढाएको भन्दै चैतर्फी रुपमा आलोचना भएको छ ।

एन्फा निर्वाचनमा केसी सहितको प्यानलले उम्मेदवारी दर्ता गराएको थियो । अन्तिम समयमा सरकारको निर्णय अनुसार संघ कारबाहीमा परेको भन्दै निर्वाचनमा सहभागी नहुने भएको हो ।

‘सरकारले नगर भनेको कुरामा हामी सहभागी हुने कुरा भएन । नेपाल सरकारले नगर भनेको छ । संघलाई निलम्बनको कारबाही गरेको छ । चुनावी प्रकृयामा सहभागी बन्दा हामीलाई पनि कारबाही हुन्छ ।’ केसीले खेलपाटीसँग भने ।

केसी सहितको प्यानलले बिहीबार काठमाडौंमा पत्रकार सम्मेलनको आयोजना गरेर थप जानकारी दिने तयारी गरेको छ ।