टुचेल सन् २०२८ सम्म इङ्ग्ल्यान्डको मुख्य प्रशिक्षक रहने

काठमाडौं। थोमस टुचेल सन् २०२८ सम्म इङ्ग्ल्यान्ड फुटबल टिमको मुख्य प्रशिक्षक रहने भएका छन्।

जर्मन प्रशिक्षकसँग दी फुटबल एसोसिएसन (एफए)ले २०२८ को युरो च्याम्पियनसिपसम्म रहनेगरी सम्झौता थप गरेको हो।

उनी सन् २०२४ अक्टोबरमा टोलीको प्रशिक्षकमा नियुक्त भएका थिए। ५२ वर्षीय टुचेलको प्रशिक्षणमा इङ्ग्ल्यान्डले यस वर्ष उत्तर अमेरिकामा हुने विश्वकपको छनोट चरणमा उत्कृष्ट प्रदर्शन गरेको थियो। उनको नेतृत्वमा टोलीले समूहका सबै आठ खेल जित्दै अपराजित यात्रा तय गरेको थियो।

नयाँ सम्झौतापछि टुचेलले खुसी व्यक्त गर्दै भने, ‘इङ्ग्ल्यान्डसँगको समय लम्ब्याउन पाउँदा म अत्यन्तै गौरवान्वित र उत्साहित छु। खेलाडी र कोचिङ स्टाफसँग काम गर्ने हरेक क्षण मैले आनन्द लिएको छु। विश्वकपमा टोलीको नेतृत्व गर्न पाउनु मेरो लागि विशेष अवसर हो र हामी देशलाई गर्व गराउने पूरा प्रयास गर्नेछौं।’