पोर्टो पुगे थियागो

काठमाडौं। अनुभवी ब्राजिली डिफेन्डर थियागो सिल्भा सिजनको अन्त्यसम्मका लागि पोर्चुगिज लिगका शीर्ष टोली पोर्टोमा आबद्ध भएका छन्।

पोर्टोको ‘एक्स’मार्फत यो घोषणा गरेको हो। ब्राजिलियन क्लब फ्लुमिनेन्सेसँगको उनको सम्झौता ६ महिनाअघि नै समाप्त भएको थियो। त्यसपछि उनले पोर्टोसँग सम्झौता गरेका हुन्।

भिडियो सन्देशमा सिल्भाले भने,‘म निकै उत्साहित छु। म सकेको सबैभन्दा राम्रो तरिकाले टिमलाई सहयोग गर्न चाहन्छु।’ पोर्टोले जारी गरेको विज्ञप्तिमा सिल्भा सिजनको अन्त्यसम्मका लागि अनुबन्धित भएको र अर्को एक सिजन थप्ने विकल्पसमेत रहेको जनाएको छ। यस सम्झौतामा कुनै पनि ट्रान्सफर शुल्क लागेन।

४१ वर्षीय सिल्भाले जुलाईमा फ्लुमिनेन्सेलाई क्लब विश्वकपको सेमिफाइनलसम्म पुर्‍याउन महत्त्वपूर्ण भूमिका खेलेका थिए। उनले ब्राजिलका लागि ११३ अन्तर्राष्ट्रिय खेल खेलेका छन्। पछिल्ला चारवटै विश्वकपमा टोलीको सदस्य रहेका थिए।

आगामी समरमा हुने प्रतियोगिताका लागि राष्ट्रिय टोलीमा पुनः बोलाउने आशा पनि उनले राखेका छन्। सिल्भाले सन् २००४–०५ सिजनमा छोटो समयका लागि पोर्टोमै खेलेका थिए। तर, त्यो बेला उनी दोस्रो डिभिजनमा मात्र सीमित थिए।

पछि उनले फ्लुमिनेन्सेबाट करिअर अगाडि बढाउँदै एसी मिलान, पेरिस सेन्ट–जर्मेन (पीएसजी) र चेल्सीजस्ता युरोपेली ठूला क्लबहरूमा खेल्दै विश्वकै उत्कृष्ट डिफेन्डरमध्ये एकको पहिचान बनाए। उनले सन् २०२१ मा लन्डनस्थित क्लब चेल्सीसँग च्याम्पियन्स लिगको उपाधि जितेका थिए।