एरिका र प्रशिक्षक कुशल सम्मानित

काठमाडौं। नेपाल सितोरियो कराते संघले अन्तर्राष्ट्रिय पदक विजेता खेलाडी एरिका गुरुङ र प्रशिक्षक कुशल श्रेष्ठलाई सम्मान गरेको छ।

संघले एरिकालाई १ लाख र कुशललाई ५० हजार रुपैयाँ नगदसहित सम्मान गरेको हो। एरिकाले चीनको हाङ्झाउमा सम्पन्न सन् २०२२ को एसियाली खेलकुदमा महिला कुमुते ६८ किलोमाथिको तौल समूहमा रजत पदक जितेकी थिइन्।

उक्त समूहको सेमिफाइनलमा उनले हङकङकी यान काइ होलाई ८–४ को अन्तरले पराजित गर्दै फाइनलमा प्रवेश गरेकी थिइन्। एरिकाको यो पदक २५ वर्षपछि एसियाली खेलकुदमा व्यक्तिगत प्रतिस्पर्धामा नेपालको तेस्रो रजत पदक हो।

साथै, यो १९औं एसियाली खेलकुदमा नेपालको एकमात्र रजत पदक पनि हो। सन् २०२४ मा अमेरिकामा आयोजित यूएस ओपन इन्टरनेसनल कराते च्याम्पियनसिपमा उनले स्वर्ण र रजत दुवै पदक जितेकी थिइन्।

उाले यसवर्ष अस्ट्रेलियन ओपन कराते च्याम्पियनसिपमा स्वर्ण पदक जितेर फेरि नेपाललाई गौरवान्वित बनाएकी छन्। त्यस्तै, २०२५ जुन ३ मा उनले मोरक्कोको राबातमा सम्पन्न कराते–१ प्रिमियर लिगमा ऐतिहासिक उपलब्धि हात पार्दै नेपालका लागि पहिलोपटक पदक जितिन्।

महिला कुमुते ६८ किलोमाथि समूहमा प्रतिस्पर्धा गर्दै उनले फ्रान्सकी पिया क्लेमेंसलाई रिपिचाज राउन्डमा ६–२ ले पराजित गर्दै कांस्य पदक जितेकी थिइन्। यो नेपालको कराते इतिहासकै सबैभन्दा ठूलो अन्तर्राष्ट्रिय सफलता मानिएको छ। अब उनले इजिप्टको कायरोमा विश्व कराते च्याम्पियनसिप खेल्नेछिन्।

यी सबै सफलतामा कुशल उनको प्रशिक्षक हुन्।