नेपालको ६ विकेटको जित

काठमाडौं । आईसीसी टी ट्वान्टी विश्वकपको छनोटको तयारीमा रहेको नेपालले ओमानविरुद्धको वार्मअप म्याचमा जित निकालेको छ ।

शनिबार भएको पहिलो वार्मअप म्याचमा नेपालले ओमानलाई ६ विकेटले हराएको हो ।

ओमानले प्रस्तुत गरेको १ सय ११ रनको लक्ष्य नेपालले मात्र ४ विकेट गुमाएर १७ ओभरमा पुरा गर्यो ।

नेपालको जितमा आसिफ शेखले ६१ रनको शानदार ईनिङ्स खेले । रोहित पौडेलले २५ र कुशल भुर्तेलले ११ रन बनाए । कुशल मल्ल १० र सन्दीप जोरा १ रनमा नटआउट रहे ।

पहिले ब्याटिङ गरेको ओमानले ९ विकेटको क्षतिमा १ सय १० रन बनाएको थियो ।

ओमानलाई सस्तैमा समेट्न सोमपाल कामी, सन्दीप लामिछाने र दिपेन्द्र सिंह ऐरीले समान दुई दुई विकेट लिएका थिए ।

आईसीसी टी ट्वान्टी विश्वकपको एसिया र इस्ट एसिया प्यासिफिक छनोट खेल्न नेपाली टिम ओमानमा रहेको छ ।

नेपालले विश्वकप छनोटको समूह चरणमा कुवेत र जापानसँग खेल्नेछ । समूह चरणको शीर्ष स्थानमा रहेको खण्डमा नेपाल सुपर सिक्समा छनोट हुनेछ ।

सुपर सिक्सको शीर्ष तीन टिमले अर्को वर्ष हुने टी ट्वान्टी विश्वकपमा स्थान बनाउनेछ ।