झन्डै चार वर्षपछि ‘ए’ डिभिजन लिग गर्ने सहमति

काठमाडौं। अखिल नेपाल फुटबल संघ (एन्फा)ले झन्डै चार वर्षपछि क्लबसँग ‘ए’ डिभिजन लिग आयोजना गर्ने सहमति गरेको छ।

सातदोबाटोस्थित एन्फा कम्प्लेक्समा सोमबार बसेको एन्फा पदाधिकारी र ‘ए’ डिभिजनका क्लबका अध्यक्षबीचको बैठकले अर्को वर्षको पुस ३ गतेदेखि लिग गराउने सहमति गरेका हुन्।

पछिल्लो सहमतिले साढे तीन वर्षभन्दा बढी समयपछि मात्र लिग आयोजना हुनेछ। पछिल्लो पटक २०७९ सालमा ‘ए’ डिभिजन लिग फुटबल आयोजना भएको थियो।

उक्त संस्करणमा चर्च ब्वाइज युनाइटेड च्याम्पियन बनेको थियो। त्यसपछि एन्फाले लिग गर्न सकेको छैन। लिग नभएकै ८७६ दिन बितेको छ। नयाँ सहमति अनुसार लिग हुन अझै ४१० दिन बाँकी छ। यस हिसाबले लिग झन्डै चार वर्षपछि मात्र हुने भएको हो।

क्लबहरूले समेत एन्फाको प्रस्ताव अनुसार लिग खेल्न नपर्ने र ‘ए’ डिभिजन हैसियत पनि बाँकी नै रहने भएपछि सहमति जनाएर हस्ताक्षर गरेका छन्। ‘ए’ डिभिजन हैसियतका १४ क्लबले अर्को वर्ष हुने एन्फा चुनावमा भाग लिन पनि पाउने भएका छन्।

‘ए’ डिभिजनका १४ वटै क्लबलाई एन्फा निर्वाचनमा मताधिकार रहने व्यवस्था छ। एन्फाले यस वर्ष राष्ट्रिय लिग आयोजना गरेर ‘लिगको चक्र’ पूरा गर्ने भएको छ। राष्ट्रिय लिगमा भएपछि कुनैपनि क्लब रेलिगेसनमा जाने छैनन् भने २०७९ सालको लिगका शीर्ष ६ क्लबले मात्र लिग खेल्न पर्नेछ।

यसअनुसार राष्ट्रिय लिगमा लिग च्याम्पियन चर्च ब्वाइजसँगै मच्छिन्द्र, नेपाल पुलिस क्लब, जावलाखेल युथ क्लब, सातदोबाटो युथ क्लब र न्यूरोड टिम (एनआरटी) लिगमा सहभागी हुनेछन्।

योसँगै एन्फा अध्यक्ष पंकजविक्रम नेम्वाङ नेतृत्वको चार वर्षे पहिलो कार्यकालमा एउटा मात्र ‘ए’ डिभिजन लिग हुने भएको छ।

‘एन्फाले ल्याएको प्रस्तावमा क्लबले सहमति जनाएको मात्र हो। एन्फाले नै सक्दिन भनेपछि सबै जसो क्लबले चुपचाप सहमति जनाए,’ बैठकमा सहभागी एक क्लबका पदाधिकारीले खेलपाटीसँग भने।