काठमाडौं। आर्सनलका मुख्य डिफेन्डर गाब्रिएल म्यागाल्हाएस घाइते भएका छन्। मंगलबार फुलहमविरुद्धको २–१ जितको क्रममा उनले दायाँ ह्यामस्ट्रिङ चोट बोकेका हुन्।
यस घटनाले आगामी अप्रिल ८ मा हुने च्याम्पियन्स लिग क्वार्टरफाइनलको पहिलो लेगमा रियल मड्रिडविरुद्ध उनको उपलब्धता शंकास्पद बनाएको छ।
गाब्रिएल फुलहमको काउन्टर–एट्याक रोक्न पछाडि दौडिरहेका थिए। त्यही क्रममा उनी अकस्मात् रोकिए। खेल रोकिनेबित्तिकै उनले भुइँमा बस्दै टाउको हल्लाएर आफू खेल्न नसक्ने संकेत गरेका थिए।
‘हामी चिन्तित छौं। उनी कहिल्यै मैदान छोड्न चाहँदैनन्, त्यसैले यो गम्भीर हुन सक्छ। अहिले नै निर्धारण गर्न गाह्रो छ कि चोट कति गहिरो छ,’ आर्सनलका प्रशिक्षक माइकेल आर्टेटाले भने। गाब्रिएललाई १६औं मिनेटमा जाकुब किभिओरले प्रतिस्थापन गरे।
गाब्रिएलको चोटले आर्सनललाई ठूलो धक्का लागेको छ। रिकार्डो कालाफियोरी, टेकिहिरो टोमियासु, बेन ह्वाइट र अन्य मुख्य डिफेन्डर पनि चोटका कारण टिमबाहिर छन्।
यसबाहेक जुरिएन टिम्बरले पनि फुलहमविरुद्धको खेल खेल्नुअघि चोटको समस्या झेलेका थिए। आर्टेटासँग गाब्रिएल च्याम्पियन्स लिग खेल्न तयार हुने सम्भावना छ कि छैन भनेर सोधिएको थियो। उनले संक्षिप्त जवाफ दिए,‘गाह्रो छ, तर हेर्दै जाउँ।’
