चितवनविरुद्ध पोखराको पहिलो खेल : पुनः इतिहास दोहोरिन्छ कि बदलिन्छ?
काठमाडौं। नेपाल सुपर लिग (एनएसएल)को दोस्रो संस्करणमा पोखरा थन्डर्सले त्यही लक्ष्य लिएर मैदानमा उत्रिएको थियो, जुन हासिल गर्न चाहन्थ्यो।
तर, त्यो सपना अधुरै रह्यो। स्टार खेलाडी आयुष घलानले हिम्मतका साथ प्रहार गरेको पेन्का पेनाल्टी धनगढीका गोलकिपर मोहम्मद ताहाले रोकिदिए, जसले गर्दा पोखराले सिधै फाइनलमा पुग्ने अवसर गुमायो।
अर्को अवसरमा ललितपुर सिटी एफसीले पोखरालाई ३–१ ले हराउँदै फाइनलमा स्थान बनायो र अन्तत: धनगढीलाई पाखा लगाउँदै उपाधि नै चुम्यो।
तर, त्यो त अतीत भइसकेको छ।। पोखराका मुख्य प्रशिक्षक सुमन श्रेष्ठ ती पलहरू सम्झन चाहँदैनन्। तर, यसपल्ट आफ्नो टिमले अघिल्लो संस्करणका कमजोरीहरू सुधार्दै उत्कृष्ट प्रदर्शन गर्ने लक्ष्य राखेको उनी स्पष्ट पार्छन्। ‘हामीले अघिल्लो सिजनका गल्तीहरू दोहोर्याउने छैनौं,’ उनी भन्छन्।
एनएसएलको तेस्रो संस्करणमा पोखराले आफ्नो यात्रा एफसी चितवनविरुद्धको खेलबाट सुरु गर्नेछ। अघिल्ला दुई संस्करणमा यी दुई टोलीबीच लिग चरणमा मात्रै दुई पटक भिडन्त भएको थियो, जसमा पोखरा अपराजित छ। तर, सोमबार त्रिपुरेश्वरस्थित दशरथ रंगशालामा चितवनसँग तेस्रो भेट हुँदा पोखरालाई पहिलो संस्करणको एक पीडादायक सम्झना झस्काउनेछ।
उक्त संस्करणमा जितविहीन रहँदै प्रतियोगिता सक्काएको चितवनले आफ्नो अन्तिम खेलमा पोखरालाई २–१ ले रोकेको थियो। उक्त खेलमा पोखराले अलिक बढी गोल गर्न सक्थ्यो भने बुटवल लुम्बिनी एफसीलाई पछि पार्दै पहिलो संस्करणमा नै प्लेअफको यात्रा तय पनि गर्थ्यो। तर, चितवनले त्यो हुन दिएन।
पहिलो संस्करणमा चितवनसँगको हारको बदला पोखराले दोस्रो संस्करणमा लिएको थियो। उत्कृष्ट सुरुआत गर्दै लिग चरणमा शीर्ष स्थानमा रहन सफल पोखराले चौथो खेलमा चितवनलाई १–० ले हराएको थियो।
उक्त खेलमा मोसेस ग्याबाह उमले ७१औं मिनेटमा गरेको गोल निर्णायक बनेको थियो। यदि सो खेलको नतिजा केही फरक भएको भए चितवनले अहिले भन्न सक्थ्यो– हामीले पनि एनएसएलको प्लेअफ खेलेका थियौं। तर, पोखराले त्यो सम्भावनालाई रोकिदियो।
तर, यो नयाँ सिजन हो। नयाँ चुनौतीहरू प्रशस्त छन्। सोमबार त्रिपुरेश्वरस्थित दशरथ रंगशालामा हुने तेस्रो भेटमा पोखराले फेरि चितवनलाई पराजित गर्छ या चितवन पहिलो संस्करणको झल्को दोहोर्याउनेछ? त्यसको उत्तर खेलमै पाइनेछ।
नवीनको पुरानो टोलीविरुद्ध भिडन्त
यसपटक चितवनलाई प्रशिक्षक नवीन न्यौपानेले सम्हालेका छन्। अघिल्लो संस्करण पोखरालाई क्वालिफायरमा पुर्याएका नवीनले यसपटक चितवनलाई बलियो बनाउने लक्ष्य लिएका छन्। उनलाई पोखराले भित्र्याएका खेलाडीबारे राम्रो जानकारी छ, जसले उनलाई रणनीति बनाउन सजिलो बनाउनेछ।
चितवनका लागि यो सिजन थप चुनौतीपूर्ण हुनेछ। तर, चितवनसँग राष्ट्रिय टोलीका अनुभवी खेलाडीहरू छन्। स्टार फरवार्ड अञ्जन विष्टको अनुभव चितवनका लागि ठूलो लाभदायक बन्न सक्छ।
यसबाहेक राष्ट्रिय टोलीबाट खेलिसकेका सुमित श्रेष्ठ, अभिषेक लिम्बू, जय गुरुङ, शिशिर लेखी, विशाल श्रेष्ठ र छिरिङ गुरुङजस्ता खेलाडी चितवनमा छन्। यी सबै खेलाडीसँग प्रशिक्षक नवीनले पहिल्यै काम गरिसकेका छन्, जसले उनलाई टिम व्यवस्थापनमा सहज बनाउनेछ।
चितवनले घानाका आक्रमणकारी मिडफिल्डर टोरिक जेबरिनलाई पनि निरन्तरता दिएको छ। अघिल्लो सिजन चितवनका लागि एक गोल गरेका जेबरिनले यसपल्ट टोलीलाई थप बलियो बनाउने अपेक्षा गरिएको छ।
साथै मोफसल फुटबलमा उत्कृष्ट प्रदर्शन गरेका युसुफ मलिकलाई पनि चितवनले अनुबन्ध गरेको छ। उनी पछिल्लो समय मच्छिन्द्र फुटबल क्लबबाट खेल्दै आएका थिए।
अधिकांश प्रतियोगितामा मच्छिन्द्र र सुमनले सम्हालेको चर्च ब्वाइज युनाइटेडको भेट भएको हुँदा पनि युसुफलाई उनको रणनीति बिट गर्न सकस हुने छैन। त्यसैले नवीन भन्छन्,‘चितवन यसअघि दुई पटक प्लेअफमा पुग्न सकेको थिएन। यसपल्ट फाइनलसम्म पुर्याएर ट्रफी जित्ने लक्ष्य राखेको छु।’
युवाको साथमा पोखरा
पोखरा भने यस सिजन युवा खेलाडीहरूमा भर परेर मैदानमा उत्रिनेछ। मार्की खेलाडी समीर तामाङको नेतृत्वमा रहेको टोलीले आयुष घलानलाई निरन्तरता दिएको छ। नवयुग श्रेष्ठ कप्तान बनेपछि घलानको कप्तानी खोसिएको भए पनि उनले टोलीको मुख्य भूमिका निभाउनेछन्।
पोखराको टोलीमा सुरजज्यू ठकुरी, कृशल मोक्तान, पदम भट्टराई, सकल रेग्मी, प्रविनकुमार सुनार, विशाल तामाङ, एकराज बुढाथोकी, नरेन्द्र चौधरी, गौरव श्रेष्ठ, चन्दन दास, सुदिल राईलगायतका खेलाडी छन्, जसले टिमलाई मजबुत बनाउनेछन्।
यस्तै, अघिल्ला संस्करणमा काठमाडौं रेजर्स र बुटवल लुम्बिनी एफसीबाट समान तीन गोल गरेका २७ वर्षीय क्यारुनका सेन्ट्रल फरवार्ड स्टेफेन समीर बिनोङले ‘गेम चेन्जर’ को भूमिका खेल्न सक्छन्। यस सिजन आफूले चाहेको टिम तयार गर्न पाएको मुख्य प्रशिक्षक सुमन सुनाउँछन्।
‘हामी यसपटक उत्कृष्ट नतिजा ल्याउने लक्ष्यसहित आएका छौं। टिम व्यवस्थापनले राम्रो साथ दिएको छ र खेलाडीहरू मानसिक रूपमा तयार छन्,’ उनले भने।
