बलियो चर्च ब्वाइजलाई एपिएफको चुनौती

बुटवल। २३औं तिलोत्तमा गोल्डकपको उपाधिका लागि शनिबार चर्च ब्वाइज युनाइटेड क्लब र विभागीय टोली एपिएफ भिड्दै छन्। 

देविनगरस्थित एन्फा टेक्निकल खेलमैदानमा खेल अपरान्ह्र ४ बजे सुरु हुनेछ। उक्त खेलको प्रत्यक्ष प्रसारण खेलपाटी टिभी (युट्युब) मार्फत हुनेछ।

अबायोमी फाकुल्नेको कप्तानीमा रहेको चर्च ब्वाइजले दोस्रो सेमिफाइनलमा लिग प्रतिद्वन्द्वी मच्छिन्द्र फुटबल क्लबमाथि ४–१ को सानदार जित निकाल्दै फाइनलको यात्रा तय गरेको हो।

यस सिजन बुढासुब्बा, झापा गोल्डकपलगायत मुख्य प्रतियोगिता जितिसकेको चर्च आफ्नो पाँचौं उपाधि उचाल्ने लक्ष्यमा छ। नियमित देखिरहेका भन्दा विपरीतका खेलाडी लिएर मैदान उत्रिरहेको चर्च ब्वाइजलाई यसपल्ट विदेशी खेलाडीको बलियो साथ छ। यही साथमा चर्च ब्वाइजले फाइनलसम्मको यात्रा तय गरेको हो।

चर्च ब्वाइजका अमार्न्ड बेएडुम निक्कै उत्कृष्ट लयमा छन्। जारी प्रतियोगितामा ह्याट्रिक गर्ने उनी दोस्रो खेलाडी हुन्। उनकै सानदार प्रदर्शनमार्फत चर्च ब्वाइजले फाइनलको यात्रा तय गरेको हो। कप्तान फाकुल्नेले पनि उनलाई बलियो साथ दिइरहेका छन्।

यता, विभागीयमा अवसर खोजिरहेका खेलाडीलाई लिएर मैदान उत्रिएको एपिएफले भने संघर्षपूर्ण जित निकाल्दै फाइनलको यात्रा तय गरेको हो। एपिएफले क्वार्टरफाइनल र सेमिफाइनल दुवैमा समान १–० को जित निकालेको हो। पहिलो खेलमा आयोजक रुपन्देहीलाई हराएको एपिएफले सेमिफाइनलमा संकटा क्लबलाई पाखा लगाएको थियो। फिनिसिङमा समस्या रहेको एपिएफ उक्त स्थानमा सुधार गरेर उपाधि जित्ने लक्ष्यमा हुनेछ।

प्रतियोगिताको विजेता टिमले नगद १२ लाख १२ हजार २२२ रुपैयाँ प्राप्त गर्नेछन्। उपविजेता टिमले ६ लाख, ६६ हजार ६६६ रुपैयाँ तथा विधागत उत्कृष्ट खेलाडीहरूलाई गोलरक्षक, डिफेन्डर, मिडफिल्डर, फरवार्ड, कोचलाई नगद ३१ हजार र कप तथा सर्वोत्कृष्ट खेलाडीलाई स्कुटर वा मोटरसाइकल उपहार तथा प्रत्येक दिनको म्यान अफ द म्याचलाई नगद ११ हजार १११ रुपैयाँबाट पुरस्कृत गरिने छ।