काठमाडौं। रियल मड्रिडका मुख्य प्रशिक्षक कार्लो एन्सेलोटी कर छलिको आरोपमा बुधबार स्पेनको अदालतमा उभिने भएका छन्।
स्पेनी सरकारी अभियोजनकर्ताहरूले सन् २०१४ र २०१५ मा एन्सेलोटीले १० लाख युरो (एक मिलियन डलर) कर छलि गरेको आरोप लगाएका छन्।
शुक्रबार मड्रिडस्थित अदालतले मुद्दाको सुनुवाइ मिति तय गरेको हो। अभियोजन पक्षले चार वर्ष नौ महिनासम्मको जेल सजाय माग गरेका छन्। उनीहरूले एन्सेलोटीले शेल कम्पनीहरू प्रयोग गरी आफ्नो वास्तविक आम्दानी लुकाएको आरोप लगाएका छन्।
६५ वर्षीय एन्सेलोटीले भने आफू निर्दोष रहेको बताएका छन्। एन्सेलोटी फुटबल इतिहासकै सबैभन्दा सफल प्रशिक्षकमध्ये एक हुन्। उनी पाँच पटक च्याम्पियन्स लिग जित्ने एकमात्र प्रशिक्षक हुन्।
उनले तीन पटक रियल मड्रिड र दुई पटक एसी मिलानबाट च्याम्पियन्स लिग जितेका हुन्। उनले इङ्ल्यान्ड, स्पेन, इटाली, जर्मनी र फ्रान्समा पनि लिग जितेका छन्।
एन्सेलोटी सन् २०१३–१५ मा रियलको प्रशिक्षक थिए र २०२१ देखि पुनः क्लबको नेतृत्व गरिरहेका छन्।
