काठमाडौं। ब्राजिलियन राष्ट्रिय टिमका मुख्य प्रशिक्षक डोरिवाल जुनियरलाई शुक्रबार बर्खास्त गरिएको छ। १४ महिनासम्म टिमको नेतृत्व गरेका जुनियरलाई कमजोर नतिजा र निराशाजनक प्रदर्शनका कारण हटाइएको हो।
ब्राजिल फुटबल महासंघ (सिबिएफ)का अध्यक्ष एडनाल्डो रोड्रिग्सले अर्जेन्टिनासँग ४–१ को पराजयपछि जुनियरलाई पदमुक्त गर्ने निर्णय गरेका हुन्। विश्वकप छनोटमा यो ब्राजिलको अहिलेसम्मकै ठूलो पराजय हो।
‘हामीले डोरिवाल जुनियरको कार्यकाल अन्त्य गर्ने निर्णय गरेका छौं,’ रोड्रिग्सले रियो डे जनेरियोमा आयोजित पत्रकार सम्मेलनमा भने, ‘अब हामी नयाँ प्रशिक्षकको खोजी गर्नेछौं।’
६२ वर्षीय जुनियरको नेतृत्वमा ब्राजिलले सात जित, सात बराबरी र दुई हार बेहोरेको थियो। टिमले २५ गोल गर्दा १७ खायो। तर, पछिल्ला चार खेलमध्ये ब्राजिलले सिर्फ एक खेल मात्र जितेको छ। सन् २०२३ को कोपा अमेरिकामा उरुग्वेसँग पेनाल्टीमा पराजित हुँदै ब्राजिल क्वार्टरफाइनलबाट बाहिरिएको थियो।
रोड्रिग्सले रियल मड्रिडका प्रशिक्षक कार्लो एन्सेलोटीलाई पुनः प्रस्ताव गर्ने बताइएको छ। साथै अल–हिलालका प्रशिक्षक जोर्ज जिसस पनि सम्भावित विकल्पका रूपमा हेरिएको छ।
यदि यीमध्ये कुनै पनि प्रशिक्षक आए भने इतिहासमा पहिलो पटक ब्राजिलले विदेशी प्रशिक्षक पाउने छ। विश्वकप छनोटमा ब्राजिलले जुन महिनामा इक्वेडर र पाराग्वेविरुद्ध खेल्नेछ। तर, रियल र अल–हिलाल दुवै क्लबले वर्ल्डकप खेल्ने तय रहेकोले नयाँ प्रशिक्षक को हुन्छन् भन्नेबारे अन्योल कायम छ।
