काठमाडौं। ‘अशोभनीय व्यवहार’ आरोपमा युरोपियन फुटबलको शासकिय निकाय युरोपेली फुटबल महासंघ (युइएफए)ले रियल मड्रिडका चार खेलाडीविरुद्ध अनुसन्धान थालेको छ।
च्याम्पियन्स लिगको अन्तिम १६ को खेलमा एट्लेटिको मड्रिडलाई हराएपछि ‘अशोभनीय व्यवहार’ आरोपमा सुपरस्टार फरवार्ड किलियन एमबाप्पे र भिनिसियस जुनियरसहित एन्टोनियो रुडिगर र डानी सेबालोसमाथि अनुसन्धान थालिएको हो।
युइएफएका अनुसार अशोभनीय व्यवहार गरेको आरोपमा छानबिन गर्न निरीक्षक नियुक्त गरिएको छ। ‘एट्लेटिका खेलाडीहरूमाथि अशोभनीय व्यवहार गरेको आरोपमा छानबिन गर्न युइएफए आचारसंहिता तथा अनुशासन निरीक्षक नियुक्त गरिएको छ,’ विज्ञप्तिमा भनिएको छ।
स्पेनी मिडिया रिपोर्टका अनुसार रियलका खेलाडीहरूले जितपछि गरेको उत्सव (सेलिब्रेसन)को तरिका युइएफएको अनुसन्धानको केन्द्रबिन्दु बनेको छ।
मार्च १२ मा मेट्रोपोलिटानो स्टेडियममा भएको खेलमा रियलले एट्लेटिकोलाई पेनाल्टी सुटआउटमा पराजित गरेको थियो। समग्र स्कोर २–२ को बराबरीमा सकिएपछि खेल पेनाल्टीमा पुगेको हो।
तर, एट्लेटिकोका फरवार्ड जुलियन अल्भारेजले पेनाल्टी प्रहार गर्दा बल दुई पटक छोएको भन्दै रद्द गरिएपछि विवाद उत्पन्न भएको थियो। रियल हाल च्याम्पियन्स लिगको १५ पटकको कीर्तिमानी र साबिक विजेता हो। अप्रिल ८ मा क्वार्टरफाइनलको पहिलो लेगमा रियललर् आर्सनलको सामना गर्नेछन्।
