बुटवल। चर्च ब्वाइज युनाइटेड र मच्छिन्द्र फुटबल क्लब २३औं तिलोत्तमा गोल्डकपको सेमिफाइनलमै भिड्ने भएका छन्।
देविनगरस्थित एन्फा टेक्निकल खेलमैदानमा मंगलबार सम्पन्न अन्तिम क्वार्टरफाइनलमा मच्छिन्द्रले एडोर्न गडवाल स्पोर्टिङ क्लब, देहरादुनमाथि १–० कठिन जित निकाल्को हो। योसँगै चर्च ब्वाइज र मच्छिन्द्रको भेट पक्का भएको हो।
यी दुई टोली दोस्रो सेमिफाइनलमा भिड्नेछन्। यी दुईबीचको खेल भने बिहीबार हुने तय छ। दोस्रो क्वार्टरफाइनलमा चर्च ब्वाइजले टाइब्रेकरमा विभागीय टोली नेपाल पुलिस क्लबलाई ४–३ ले पराजित गर्दै अन्तिम चारको यात्रा तय गरेको थियो।
बराबरीतर्फ उन्मुख खेलमा राजीव लोप्चनले गोल गर्दै मच्छिन्द्रलाई अन्तिम चारमा पुर्याएका हुन्। उनले निर्धारित ९० मिनेटको खेल सकिन अन्तिम दुई मिनेट बाँकी रहँदा गोल गरेका हुन्।
फ्रिककमार्फत आएको बललाई विवेक राईले पेनाल्टी बक्सबाहिरबाट भलिको प्रयास गरेका थिए। तर, उचाइ लिँदै सिक्सयार्ड बक्सनजिक बल खस्न पुग्दा अनमार्क रहेका राजीवलाई गोलको अवसर जुरेको हो। जसलाई उनले बिनागल्ती लेफ्ट फुटेट सटमार्फत पहिलो बारतर्फ गोल गरे।
यो गोलसँगै खेल टाइब्रेकरमा पुग्न पाएन। खेलको म्यान अफ द म्याच पनि राजीव नै घोषित भए। उनले ११ हजार १११ रुपैयाँ प्राप्त गरे। योसँगै प्रतियोगिताको सेमिफाइनल समीकरण पूरा भएको छ। पहिलो सेमिफाइनलमा विभागीय टोली एपिएफ र संकटा क्लब भिड्ने भएका छन्। यी दुईबीचको खेल बुधबार अपरान्ह्र ४ बजे हुनेछ।
एपिएफले आयोजक रुपन्देही–११ लाई १–० र संकटाले जर्जियन फुटबल क्लब कालिम्पोङ भारतलाई ४–० ले पाखा लगाउँदै अन्तिम चारमा स्थान बनाएका हुन्।
सम्पूर्ण खेलको प्रत्यक्ष प्रसारण खेलपाटी टिभी (युट्युब) मार्फत भइरहेको छ।
