काठमाडौं। इङ्लिस प्रिमियर लिग क्लब लिभरपुलका राइट ब्याक ट्रेन्ट एलेक्जेन्डर–आर्नोल्डले इङ्लिस लिग कपको फाइनल गुमाउने भएका छन्।
लिभरपुलले फाइनलमा न्युक्याससँग भिड्ने पक्का भइसकेको छ। तर, चोटको कारण उनले उक्त फाइनल गुमाउने मुख्य प्रशिक्षक आर्ने स्लटले शुक्रबार पुष्टि गरे।
इब्राहीमा कोनाटे भने आइतबार हुने फाइनलमा उपलब्ध हुने अपेक्षा गरिएको थियो। तर, उनी शुक्रबारको प्रशिक्षणमा उपलब्ध भएनन्।
कोनाटेलाई पेरिस सेन्ट–जर्मन (पिएसजी)विरुद्धको च्याम्पियन्स लिग खेलको अतिरिक्त समयमा परिवर्तन गरिएको थियो। उक्त खेलमा पिएसजी पेनाल्टी सुटआउटमा विजयी हुँदै क्वार्टरफाइनलमा प्रवेश गरेको थियो। स्लटले कोनाटे थकित भएको अनुमान गरेका थिए।
आर्नोल्डले मंगलबारको खेलको दोस्रो हाफमा मैदान छोडेका थिए। इङ्ल्यान्डका अन्तर्राष्ट्रिय खेलाडी लामो समयका लागि बेन्चमा रहनेछन्।
‘ट्रेन्ट साँच्चिकै उपलब्ध छैन,’ स्लटले पत्रकार सम्मेलनमा भने,‘उनी कति समय बाहिर रहनेछन् भन्ने अझ एकिन गर्न बाँकी छ। तर, हामी उनी सिजनको अन्त्यतिर फर्कने अपेक्षा गर्छौं।’
आइतबारको खेलका लागि राइट ब्याकको विकल्पमा जरेल क्वान्सा र वातारु एन्डो छन्। तर, स्लटले कर्टिस जोन्सलाई पनि सम्भावित खेलाडी मानेका छन्।
