काठमाडौं। अन्तिम सिट्टी लगत्तै स्टेडियमभरि पटाका पड्किए। यो ‘सेलिब्रेट अरु केही को थिएन। यो त ४१ वर्षपछि युरोपको शीर्ष प्रतियोगिता च्याम्पियन्स लिगमा फर्किएको एस्टन भिल्लाको सानदार यात्राको सम्मानमा गरिएको हो।
बुधबार राति भएको खेलमा भिल्लाले क्लब ब्रुग्गेलाई ३–० ले पराजित गर्दै क्वार्टरफाइनलमा स्थान बनायो। भिल्लाको जितमा सबैभन्दा ठूलो प्रभाव मार्को एसेन्सियोको रह्यो। उनले दोस्रो हाफमा मैदान छिरेर दुई गोल गरे।
च्याम्पियन्स लिग इतिहासमा सबैभन्दा धेरै गोल गर्ने ‘सब्स्टिट्युट’ खेलाडीको रूपमा परिचित एसेन्सियोले यस खेलमा फेरि आफ्नो प्रभाव देखाए। उनले ५१ खेलमा १२औं पटक ‘सब्स’ भएर गोल गर्ने कीर्तिमान बनाएका छन्।
अब एसेन्सियोको अगाडि उनकै पूर्वक्लब पेरिस सेन्ट–जर्मेन (पिएसजी) छ। पिएसजीलाई हराएर भिल्ला सेमिफाइनल पुग्नुपर्नेछ।
२९ वर्षीय स्पेनिस फरवार्ड रियल मड्रिडमा झण्डै १० वर्ष बिताएपछि पिएसजी गएका थिए। तर, त्यहाँ उनले खासै प्रभाव पार्न सकेनन्। यही कारण युरोपको विन्टर ट्रान्सफर विन्डोको अन्तिम दिन भिल्ला आए। उनले हालसम्म पाँच खेलमा सात गोल गरिसकेका छन्।
उनले क्लब ब्रुग्गेविरुद्ध पहिलो लेगमा पेनाल्टीमार्फत गोल गरे। बुधबारको खेलमा उनले ५०औं र ६१औं मिनेटमा गोल गर्दै टोलीलाई जित दिलाए। ‘हामी सबै नयाँ खेलाडीहरू अझै अनुकूल हुँदैछौं,’ एसेन्सियोले भने।
उनले मार्कस रासफोर्ड र एक्सेल डिसासीलाई संकेत गर्दै भने, ‘हामी सही दिशामा छौं, यसरी नै निरन्तर अगाडि बढ्नुपर्छ। म यहाँ धेरै सहज महसुस गरिरहेको छु। टिम, समर्थक र सहर सबैसँग खुसी छु।’
भिल्लाको जितलाई ब्रिटेनका राजकुमार विलियमले पनि ‘सेलिब्रेट’ गरे। उनी आफ्नो मनपर्ने टोली भिल्लाको खेल हेर्न ‘भिल्ला पार्क’ मा उपस्थित थिए।
उनले खेलको अघिल्लो दिन भिल्लाको प्रशिक्षण केन्द्र ‘बडिमोर हेथ’ पुगेर खेलाडीहरूलाई शुभकामना दिएका थिए। भिल्लासँगै आर्सनल पनि अन्तिम आठमा पुगेको छ। आर्सनलले क्वार्टरफाइनलमा १५ पल्टको च्याम्पियन रियल मड्रिडको सामना गर्दा भिल्लाले पहिलो उपाधिको खोजीमा रहेको पिएसजीलाई चुनौती प्रस्तुत गर्नेछ।
