काठमाडौं। ह्यारी केनले एक गोल र असिस्ट गरेपछि बायर लेभरकुसेनलाई २–० ले पराजित गर्दै बायर्न म्युनिख च्याम्पियन्स लिग क्वार्टरफाइनलमा प्रवेश गरेको छ। समग्रमा बायर्न ५–० ले विजयी भएको हो। अब बायर्न अर्को महिना इन्टर मिलानसँग भिड्नेछ।
केनले पछिल्लो साता पहिलो लेगमा दुई गोल गरेका थिए। दोस्रो लेगमा उनले ५२औं मिनेटमा जोशुआ किम्मिचको पासलाई उपयोग गर्दै ट्याप–इन गोल गरे। योसँगै उनी च्याम्पियन्स लिगको एकै सिजन १० गोल गर्ने पहिलो इङ्ग्लिस खेलाडी बनेका छन्।
‘हामीले सुरुदेखि नै आक्रामक खेल खेल्ने योजना बनाएका थियौं। मौका सिर्जना गर्यौं र पहिलो हाफमै खेल आफ्नो पक्षमा लियौं। दोस्रो हाफमा उनीहरू आक्रमणमा आउने प्रयासमा थिए। तर, हामीले सजिलै दबाबमा पार्न सफल भयौं,’ केनले खेलपछि भने।
७१औं मिनेटमा केनले वन–टच असिस्ट गर्दै अल्फोन्सो डेभिसलाई दोस्रो गोलका लागि सेट अप गरे। योसँगै बायर्नको जित सुनिश्चित भयो। पहिलो लेगमा ३–० को हार खेपेको लेभरकुसेन यस खेलमा पुनरागमन गर्ने योजनामा थियो। तर, महत्त्वपूर्ण खेलाडी फ्लोरियन विर्ट्ज घाइते भएपछि टोली कमजोर देखियो।
बायर्नले खेलको अन्त्यतिर थप गोलको अवसर सिर्जना गरेको थियो। तर, केनले एक गोल गर्ने मौका गुमाए भने जमाल मुसियालाको प्रहार क्रसबारमा ठोकियो।
अब बायर्न सिरी ‘ए’ लिगको शीर्ष स्थानमा रहेको इन्टरसँग क्वार्टरफाइनलमा भिड्नेछ। इन्टरले अन्तिम पटक सन् २०१० मा बायर्नलाई फाइनलमा पराजित गर्दै उपाधि जितेको थियो। इन्टर पुन: उपाधि जित्ने लक्ष्यमा छ।
