तिलोत्तमा गोल्डकपको विजेताले १२ लाख २२ हजार पाउने

रुपन्देही। २३औं संस्करणको तिलोत्तमा गोल्डकपको विजेताले १२ लाख २२ हजार रुपैयाँ पाउने भएका छन्।

रुपन्देही जिल्ला फुटबल संघको आयोजना हुने प्रतियोगिता चैत ९ गतेदेखि सुरु हुँदैछ। प्रतियोगितामा तीन विभागीय टोली नेपाल पुलिस, त्रिभुवन आर्मी र एपिएफसहित आठ टोलीले सहभागिता जनाउने आयोजकले आइतबार जानकारी दिएको हो।

आयोजकका अनुसार ए डिभिजन लिग विजेता चर्च ब्वाइज युनाइटेडसँगै संकटा फुटबल क्लब, मच्छिन्द्र फुटबल क्लब, थ्री स्टार क्लबले पनि सहभागिता जनाउने भएका छन्।

यस्तै, आयोजकको रुपन्देही ११ सँगै एडोर्न गडवाल स्पोर्टिङ क्लब र उज्बेकिस्तानको टोलीले पनि गोल्डकप खेल्ने भएका छन्।

प्रतियोगिताको विजेताले १२ लाख २२ हजार २२२ रुपैयाँ प्राप्त गर्नेछन्।

उपविजेताले भने ६ लाख ६६ हजार ६६६ रुपैयाँमा चित्त बुझाउने छ। सर्वोत्कृष्ट खेलाडीलाई एक थान मोटरसाइकल वा स्कुटर दिइने आयोजकले जनाएको छ।

उत्कृष्ट गोलकिपर, डिफेन्डर, मिडफिल्डर, फरवार्ड र प्रशिक्षकलाई भने समान ३१ हजार रुपैयाँ दिइने छ। प्रत्येक खेलको म्यान अफ द म्याचले ११ हजार १११ रुपैयाँ हात पार्नेछ।

रुपन्देही जिल्ला फुटबल संघका अध्यक्ष लोक पुनले प्रतियोगितालाई उत्कृष्ट बनाउन विदेशबाट समेत राम्रो टिम ल्याउने प्रयास भैरहेको बताए । उनले मोफसलको प्रतिष्ठित प्रतियोगितालाई भब्य बनाउने उद्धेश्य सहित तयारी अघि बढेको पत्रकार सम्मेलनमा बताएका थिए ।