काठमाडौं। च्याम्पियन्स लिगको अन्तिम १६ मा सबैभन्दा बहुप्रतीक्षित खेल ‘मड्रिड डर्बी’ हुनेछ, जहाँ रियल मड्रिडलाई एट्लेटिको मड्रिड पहिलो पटक हराउने दाउमा छ।
रियलले कीर्तिमानी १५ पटक च्याम्पियन्स लिगको उपाधि जितेको छ। यस प्रतियोगितामा एट्लेटिकोको लागि रियल सधैं बाधक सावित हुँदै आएको छ।
रियलले दुईपटक फाइनलमा एट्लेटिकोलाई हराएको छ भने दुई पटक नकआउट चरणबाट पनि बाहिर पठाइसकेको छ।
सन् २०१४ र २०१६ को फाइनलमा रियलले एट्लेटिकोलाई पराजित गर्दै उपाधि जितेको थियो। साथै २०१५ को क्वार्टरफाइनल र २०१७ को सेमिफाइनलमा पनि रियलले एट्लेटिकोलाई प्रतियोगिताबाट बाहिर निकालेको थियो।
तर, यस पटकको ‘डर्बी’ भिन्न हुनेछ। प्रशिक्षक डिएगो सिमिओनेको टोली उच्च लयमा छ। एट्लेटिको यस सिजन उत्कृष्ट फुटबल खेलिरहेको छ। ला लिगामा एट्लेटिको आफ्नो प्रतिस्पर्धी रियलभन्दा अगाडि छ र लिग तालिकामा मात्र एक अंकको अन्तरले बार्सिलोनाभन्दा पछि छ।
मंगलबार सान्टियागो बर्नाबेउ रंगशालामा हुने पहिलो लेगमा एट्लेटिको आफ्नै शैलीमा प्रतिस्पर्धा गर्न तयार देखिन्छ।
‘यो एक सम्मानजनक खेल हुनेछ, जहाँ दुवै टोलीले एकअर्कालाई सम्मान गर्छन्। मड्रिड सहरका लागि यो डर्बी विशेष हुनेछ र स्पेनको प्रतिनिधित्व गर्दै क्वार्टरफाइनल पुग्ने एउटा टोली पक्का हुनेछ,’ सिमियोनेले सोमबार भने।
एट्लेटिकोले हालसम्म यस सिजन रियल वा बार्सिलोनासँग कुनै खेल हारेको छैन। स्पेनिस लिगमा एट्लेटिकोले बार्सिलोनालाई उसकै मैदानमा २–१ ले हराएको थियो र रियलसँग दुवै खेल १–१ को बराबरीमा टुंग्याएको थियो। साथै कोपा डेल रेमा पनि एट्लेटिकोले गत सिजन रियललाई नकआउट गरिसकेको छ।
रियल यस प्रतियोगिताको लिग चरणमा ११औं स्थानमा रहँदा एट्लेटिको पाँचौं स्थानमा थियो। त्यसैले रियललाई म्यानचेस्टर सिटीविरुद्ध अतिरिक्त प्लेअफ खेल्नुपरेको थियो।
च्याम्पियन्स लिगको १० खेलमध्ये रियलले पाँच खेल जितेको छ। एट्लेटिकोले तीन खेल जित्दा दुई बराबरीमा टुंगिएका छन्। रियलका प्रशिक्षक कार्लो एन्सेलोटी भन्छन्, ‘डर्बी सधैं विशेष हुन्छ। यी खेलहरू प्रतिस्पर्धात्मक हुन्छन् र यो पनि त्यस्तै हुनेछ। एट्लेटिको उत्कृष्ट लयमा छ।’
रियल हालै लिगमा रियल बेटिससँग पराजित भएको थियो। एट्लेटिकोले एथलेटिक बिल्बाओलाई १–० ले हराएको थियो। अब हेर्न बाँकी छ कि मंगलबारको डर्बीमा कुन टोली उत्कृष्ट प्रदर्शन गर्छ र क्वार्टरफाइनलका लागि बलियो आधार बनाउँछ।
