धनगढी। धनगढी एफसीको ट्यालेन्ट हन्टबाट चार जना फुटबल खेलाडी छनोट भएका छन्।
नेपाल सुपर लिग (एनएसएल)को आगामी सिजनका लागि धनगढी एफसीले शनिबार धनगढीस्थित रंगशालामा गरेको ट्यालेन्ट हन्टमा चार जना खेलाडी छनोट भएका हुन्। छनोट हुनेमा दिनेश नेपाली (गोलकिपर), सुमति सार्की (फरवार्ड), सोयम चौधरी (डिफेन्डर) र सन्दीप धामी (मिडफिल्डर) छन्।
कैलाली जिल्ला फुटबल संघको प्राविधिक सहयोग र एसपिए कलेजको सहयोगमा सम्पन्न ट्यालेन्ट हन्टमा छनोट भएका चार जना खेलाडीमध्येबाट एक जना खेलाडी एनएसएलका लागि धनगढी एफसीको टिममा छनोट हुनेछन्।
तीन जना खेलाडीलाई ड्रिमर्स अफ धनगढी नामकरण गरी एसपिए कलेजमा अध्ययन गर्न छात्रवृत्ति प्रदान गरिने डिएफसीको मातृ संस्था गो ड्रिमर्सले जनकारी दिएको छ। चार जनामध्ये कसले टिमबाट खेल्ने भन्ने अन्तिम टुंगो भने सी क्याटेगोरीको अक्सनको समाप्ति पछि हुनेछ।
नेपाली क्रिकेट टोलीका स्टार खेलाडी दीपेन्द्रसिंह ऐरीलाई आफ्नो एम्बेसडर नियुक्त गरेको धनगढी एफसीले यसअघि नै नेपाली राष्ट्रिय टोलीका मिडफिल्डर कृतिशरत्न छुन्जुलाई आफ्नो मार्की खेलाडीका रूपमा अनुबन्ध गरिसकेको छ। त्यस्तै, क्लबले लेबनानी प्रिमियर लिग क्लब बुरज एफसीका स्ट्राइकर अहमद हिजाजीलाई लोनमा साइन गरेको छ।
हिजाजीले एनएसएल २०२३ मा धनगढी एफसीबाट खेलेका थिए। जहाँ उनले चार गोल गर्दै टिमलाई फाइनलसम्म पुर्याएका थिए। धनगढी एफसी एनएसएल २०२१ र एनएसएल २०२३ दुवै संस्करणमा उपविजेता बनेको थियो।
धनगढी एफसीले एनएसएलको आगामी सिजनका लागि जुआन म्यानुएल मार्टिनेज सेजलाई मुख्य प्रशिक्षकमा नियुक्त गरेको छ भने सहायक प्रशिक्षकमा धनगढीका भीष्म भाट छन्।
