काठमाडौं। केपी ओली कप फुटबल प्रतियोगिताको तेस्रो संस्करणको उपाधिका लागि साबिक विजेता मच्छिन्द्र फुटबल क्लब र विभागीय टोली त्रिभुवन आर्मी क्लब सोमबार भिड्दै छन्।
त्रिपुरेश्वरस्थित दशरथ रंगशालामा खेल साँझ ६ बजे हुनेछ। मच्छिन्द्र दुवै संस्करणको उपाधि विजेता टोली हो। पहिलो सेमिफाइनलमा आयोजक केपी एफसीलाई पराजित गर्दै मच्छिन्द्र लगातार तेस्रो संस्करणको फाइनलमा प्रवेश गरेको हो।
यस सिजन पहिलो उपाधिको खोजीमा रहेको आर्मीले भने संकटा क्लबलाई हराउँदै फाइनलमा मच्छिन्द्रसँगको भेट पक्का गरेको हो। राष्ट्रिय युवा संघ नेपालको आयोजनामा प्रतियोगिताको विजेताले १५ लाख ११ हजार एक सय ११ र उपविजेताले पाँच लाख प्राप्त गर्नेछन्।
सर्वोत्कृष्ट खेलाडीले एक लाख, उत्कृष्ट गोलरक्षक, गोलकर्ता र उदीयमान खेलाडीले समान ५० हजार पाउनेछन्। फाइनल खेल त्रिपुरेश्वरस्थित वर्ल्ड टेड्र सेन्टरको डिजिटल बोर्डबाट समेत खेलको प्रत्यक्ष प्रसारणको व्यवस्था मिलाइएको आयोजकले जनाएको छ।
