काठमाडौं। इन्टर मियामीले सोमबार मेजर लिग सकर (एमएलएस) मा ह्युस्टन डायनामोलाई ४-१ को फराकिलो अन्तरले पराजित गर्यो।
२१ वर्षीय टेलास्को सेगोभियाले आफ्नो पहिलो एमएलएस सुरुआती खेलमा दुई गोल र एक असिस्ट गरे भने ३८ वर्षीय लुइस सुआरेजले एक गोलका साथै तीन असिस्ट प्रदान गरे।
खेलको छैटौं मिनेटमा ह्युस्टनको डिफेन्सको गल्तीको फाइदा उठाउँदै सुआरेजले बक्सको छेउबाट टच पास दिए। सेगोभियाले पहिलो टचमै बललाई गोल पोस्टको नजिकै पठाउँदै मियामीलाई अग्रता दिलाए।
३७औं मिनेटमा टाडेओ अल्लेन्डेले सुआरेजको पासमा अग्रता दोब्बर बनाए। पहिलो हाफकै अन्त्यमा सेगोभियाले दोस्रो गोल गर्दै अग्रता ३-० मा पुर्याए। उनले पेनाल्टी बक्स नजिकबाट गोल गर्दै पहिलो एमएलएस सुरुआतलाई अविस्मरणीय बनाए।
७९औं मिनेटमा सुआरेजले उत्कृष्ट ड्रिबल गर्दै दुई डिफेन्डरलाई छलाए। उनले गरेको शक्तिशाली प्रहार ह्युस्टनका गोलकिपर एन्ड्रयू टारबेलको हातमा लाग्दै गोल भयो।
८५औं मिनेटमा ह्युस्टनका नयाँ खेलाडी निको लोडेइरोले सान्त्वना गोल गरे। उनी गत महिना मात्रै ह्युस्टनमा भित्रिएका हुन्।
मियामीका स्टार खेलाडी लिओनल मेसी टोलीसँग थिएनन्। मियामीले ह्युस्टनविरुद्ध पछिल्ला तीन खेल गुमाएको थियो। तर, यस खेलमा उत्कृष्ट प्रदर्शन गर्दै हारको शृंखलामा पूर्णविराम लगाएको छ।
मेसीले सिजनको पहिलो खेलमा असिस्ट गर्दै एमएलएस इतिहासमा सबैभन्दा छिटो ४० गोल योगदान (२१ गोल, १९ असिस्ट) पूरा गरेका थिए। ह्युस्टन डायनामोले यस खेल्न मेसी नउत्रिएकाले समर्थकहरूलाई अर्को खेलमा निःशुल्क टिकट उपलब्ध गराउने घोषणा गरेको छ।
