फेरि घाइते नेयमार

काठमाडौं। नेयमारको सनसनीपूर्ण फ्रिकिक गोलसँगै सान्तोस क्याम्पियोनाटो पाउलिस्टाको सेमिफाइनलमा प्रवेश गरेको छ।

क्वार्टरफाइनलमा ब्रागान्टिनोलाई सान्तोसले २–० ले पराजित गरेको हो। नेयमारले नवौं मिनेटमै सनसनीपूर्ण फ्रिकिक गोल गर्दै आफ्नो क्षमता पुनः देखाए। तर, चोटका कारण खेल पूरा गर्न सकेनन्।

ब्रागान्टिनोका पेड्रो हेन्रिकले नेयमारलाई पेनाल्टी बक्स बाहिर फाउल गरेका थिए। क्रस गर्ने ठाउँ भए पनि नेयमारले सिधै गोलको प्रयास गरे। तीव्र प्रहारसँगै उनले बललाई पोस्टको भित्री कुनामा पुर्याउँदै घरेलु टोलीलाई अग्रता दिलाए।

गोलपछि नेयमारले उत्साहपूर्वक क्यामेरातर्फ र समर्थकहरूलाई हेर्दै ‘म जबरदस्त छु’ भन्दै चिच्याए। यो गोल निकै महत्त्वपूर्ण थियो। प्रतियोगितामा दोस्रो लेगको अवसर छैन, जसका कारण सान्तोसले जित सुनिश्चित गर्नुपर्ने थियो।

ब्रागान्टिनोविरुद्धको गोल नेयमारको पछिल्लो चार खेलमा तेस्रो हो। यस अवधिमा उनले तीन असिस्ट पनि प्रदान गरिसकेका छन्। एक वर्षभन्दा लामो समय मैदान बाहिर रहेपछि उनले उत्कृष्ट प्रदर्शन गर्दै मनोबल उच्च राखेका छन्।

क्याम्पियोनाटो पाउलिस्टा ब्राजिलको साओ पाउलो राज्यका टिमहरूबीच प्रतिस्पर्धा गराइने प्रतियोगिता हो। 

ब्रागान्टिनोलाई २–० ले पराजित गरेपछि सान्तोसले अब सेमिफाइनलमा कोरिन्थियन्स, पाल्मेइरास वा साओ पाउलो एफसी र नोभोहोरीजन्टिनोबीचको विजेतासँग खेल्नेछ।

तर, खेलको दोस्रो हाफमा जब सान्तोस २–० को अग्रता लिइरहेको थियो, नेयमार फेरि घाइते भए। ७६औं मिनेटमा उनी मैदानमा लड्दै हिँड्नसमेत संघर्ष गरिरहेका देखिए। उनलाई तुरुन्तै गाब्रिएल फेरोनले प्रतिस्थापन गरे। योसँगै फेरि नेयमारलाई चोटको चिन्ता बढेको छ।

यद्यपि, नेयमार आफैं मैदानबाट हिँडेर बाहिरिएका थिए र त्यसपछि चिकित्सकहरूको निगरानीमा परे। उपचारको केन्द्रबिन्दु उनको बायाँ ह्यामस्ट्रिङ थियो, जसले नयाँ मांसपेशी चोटको संकेत गरेको छ। यसअघि उनले दायाँ खुट्टाको ह्यामस्ट्रिङ टेन्डनमा चोट व्यहोरेका थिए। यो अहिलेको चोटभन्दा भिन्न देखिएको छ।

एसिएल चोटपछि नेयमारको ब्राजिल राष्ट्रिय टोलीमा पुनरागमनको सम्भावना अनिश्चित रहेको थियो। अक्टोबर २०२४ मा प्रशिक्षक डोरिभाल जुनियरले उनी पर्याप्त रूपमा फिट नभएको भन्दै टोलीमा समावेश नगर्ने निर्णय गरेका थिए।

तर, नेयमार सान्तोसमा फर्केपछि पुनः उत्कृष्ट लयमा फर्किरहेका थिए। उनले लगातार उत्कृष्ट प्रदर्शन गरिरहेका थिए। त्यसैले मार्चमा कोलम्बिया र अर्जेन्टिनाविरुद्धको खेलका लागि डोरिभालको प्रारम्भिक टोलीमा उनको नाम समावेश गरिएको थियो।

तर, पछिल्लो चोटका कारण नेयमारको पुनरागमन फेरि ढिलो हुन सक्छ। उनले आफ्नो खेल कौशल फेरि प्रमाणित गरिरहेका बेला यो चोटले उनलाई राष्ट्रिय टोलीको महत्त्वपूर्ण खेल गुमाउने जोखिममा पार्न सक्छ।