शीर्ष स्थानमा बार्सिलोनाको पुनरागमन

काठमाडौं। बार्सिलोनाले आइतबार १० खेलाडीमा सीमित रियल सोसिडाडलाई ४–० को फराकिलो अन्तरले पराजित गर्दै ला लिगाको शीर्ष स्थानमा पुनरागमन गरेको छ। 

बार्सिलोनाले लगातार छैटौं जित दिलाउन जेरार्ड मार्टिन, मार्क कसाडो, रोनाल्ड अराउजो र रोबर्ट लेवान्डोव्स्कीले गोल गरे। 

यस जितसँगै बार्सिलोना दोस्रो स्थानमा रहेको एट्लेटिको मड्रिडलाई एक अंकले पछाडि पार्दै शीर्ष स्थानमा उक्लिएको छ। बारेसिलोनाको २६ खेलबाट ५७ र एट्लेटिकोको ५६ अंक छ।

‘अझै लामो यात्रा बाँकी छ र केही पनि छिट्टै परिवर्तन हुन सक्छ,’ बार्सिलोनाका मुख्य प्रशिक्षक हान्सी फ्लिकले भने,‘हामीलाई जित्न सकिने सबै उपाधि जित्नुछ, त्यसैले अन्तिमसम्म लडिरहनुपर्छ।’

बार्सिलोना अहिले तेस्रो स्थानमा रहेको रियल मड्रिडभन्दा तीन अंकले अघि छ। शनिबार रियलले रियल बेटिससँग २–१ को अप्रत्याशित हार बेहोरेको थियो। एट्लेटिकोले एथ्लेटिक बिल्बाओलाई १–० ले पराजित गर्दै दोस्रो स्थानमा यथावत् छ।

‘आजको खेल हाम्रो लागि निकै महत्त्वपूर्ण थियो। फेरि शीर्ष स्थानमा उक्लिनु आवश्यक थियो र हामीले उत्कृष्ट प्रदर्शन गर्यौं,’ बार्सिलोनाका डिफेन्डर रोनाल्ड अराउजोले भने।

खेलको सुरुआतमै रियल सोसिडाड समस्यामा परेको थियो। १७औं मिनेटमा एलुस्टोन्डोले बार्सिलोनाका फरवार्ड डानी ओल्मोलाई रोक्ने क्रममा फउल गरेपछि सिधै रातो कार्ड पाए। त्यसपछि खेल बार्सिलोनाको नियन्त्रणमा रह्यो।

जेरार्ड मार्टिनले २५औं मिनेटमा पहिलो गोल गरे। त्यसको चार मिनेटपछि मार्क कसाडोले दोस्रो गोल गर्दै बार्सिलोनालाई २–० को अग्रता दिलाए। रोनाल्ड अराउजोले ५६औं मिनेटमा तेस्रो गोल थपे। लेवान्डोव्स्कीले ६०औं मिनेटमा अन्तिम गोल गर्दै टिमको जित सुनिश्चित गरे।

‘सोसिडाडका लागि रातो कार्ड नै निर्णायक रह्यो। हामीले उनीहरूलाई त्यसरी गल्ती गर्न बाध्य पार्‍यौं। उनीहरू राम्रो टोली हुन्, तर आजको खेलमा जित हामी योग्य थियौं,’ प्रशिक्षक फ्लिकले भने। 

सोसिडाडले पछिल्ला तीन खेलमध्ये दुई खेल गुमाइसकेको छ। हारपछि सोसिडाड लिग तालिकाको नवौं स्थानमै यथावत् छ। ‘रातो कार्ड एकदम स्पष्ट थियो। त्यसपछि खेल खेल नै रहेन। ११ खेलाडी हुँदा नै बार्सिलोनासँग खेल्न गाह्रो छ, १० खेलाडीमा झनै कठिन भयो,’ सोसिडाडका प्रशिक्षक इमानोल अल्गुआसिलले भने। 

यस खेलमा फ्लिकले केही प्रमुख खेलाडीलाई आराम दिए। आगामी बुधबार बेन्फिकाविरुद्ध च्याम्पियन्स लिगको अन्तिम १६ को पहिलो लेग खेल्नुपर्ने भएकाले उनले टोलीलाई व्यवस्थापन गरेका थिए। ‘ला लिगामा शीर्ष स्थानमा फर्किनु निकै खुसीको कुरा हो। तर, अब हाम्रो ध्यान बेन्फिकासँगको खेलमा छ,’ फ्लिकले थपे।