तीन महिनामा एएफसी एसियन कप छनोट, के छ नेपालको तयारी?

काठमाडौं। बुधबार मात्रै इन्टरनेसनल वुमेन्स च्याम्पियनसिपको फाइनलमा पराजित भएको नेपालले अबको तीन महिनामा एएफसी एसियन कप २०२६ को छनोट खेल्दैछ।

तर, महिला टोलीसँग अब न घरेलु प्रतियोगिता छ न त अन्तर्राष्ट्रिय नै। त्यसैले सन् २०२६ को एसियन कप खेल्ने लक्ष्य बुनेको नेपाली टोलीको तयारी कस्तो हुन्छ? भन्ने प्रश्न उत्तिकै छ।

नेपाली राष्ट्रिय महिला टोलीका प्रशिक्षक राजेन्द्र तामाङ जुनदेखि सुरु हुने छनोटका लागि अहिल्यै अतालिनु नपर्ने बताउँछन्। उनी भन्छन्,‘ एन्फाले एउटा राम्रो योजना दिनुभएको छ।’

गत मंसिर पहिलो साता बसेको एएफसी महिला फुटबल कमिटीको तेस्रो बैठकले छनोट प्रतियोगिता जुन २३ देखि जुलाई ५ सम्म आयोजना गर्ने तय गरिसकेको छ। एएफसीका अनुसार छनोट चरणका खेलहरू अन्तर्राष्ट्रिय विन्डोमा हुनेछ। 

नेपालले त्यसअघि अर्थात् अप्रिलमा अर्को अन्तर्राष्ट्रिय मैत्रीपूर्ण फुटबल प्रतियोगिता खेल्ने योजना बनाएको छ। तर, उक्त प्रतियोगिता घरेलु मैदानमै हुन्छ या बाहिर हुन्छ भन्नेबारे अझै टुंगो लागिसकेको छैन।

‘पहिला फिफा विन्डोहरू खेर जान्थ्यो। अब त्यसलाई खेर नफ्याँक्ने योजना छ। अब खेलाएको खेलाइ गर्नेछौं। त्यो भयो भने सबै खेलाडी तयार हुन्छन्,’ उनी सुनाउँछन्।

नेपालले एएफसी एसियन छनोटकै लागि फेब्रुअरीको विन्डोमा किर्गिस्तान, म्यानमार र लेबनानलाई घरेलु मैदानमा बोलाएर प्रतियोगिता खेलेको हो।

लिग चरणमा किर्गिस्तान र लेबनानमाथि समान १–० को जित निकालेको नेपालले ६ वर्षपछि म्यानमारलाई २–२ को बराबरीमा रोकेको थियो। तर, त्यसको तीन दिनपछि सोही मैदानमा भएको फाइनलमा भने नेपालले २–० को नमिठो हार बेहोर्न पर्‍यो। योसँगै नेपाल एकै वर्षमा तेस्रोपल्ट उपविजेता बनेको हो।

गत फागुनमा साउदी अरबमा भएको वाफ महिला च्याम्पियनसिपको फाइनलमा जोर्डनसँग नेपाल टाइब्रेकरमा ५–३ ले पराजित भएको थियो।

गत कात्तिकमा घरेलु मैदानमै भएको साफ महिला च्याम्पियनसिपको फाइनलमा पनि बंगालदेशसँग नेपाल २–१ ले पराजित हुँदै उपविजेतामा सिमित भएको हो।

अब नेपाल यी तीन फाइनलको हार भुलेर एएफसी एसियन कप छनोटको तयारीमा लाग्ने प्रशिक्षक राजेन्द्र बताउँछन्।

‘एन्फाको योजनाअनुसार चल्न सक्यौं भने हाम्रो खेलाडी अलिक बलियो हुन्छ। एकजुट हुन पनि सहयोग पुग्छ,’ उनले सुनाए, ‘त्यसलाई सदुपयोग गर्न सक्यौं भने एसियन कप छनोट खेल्न सकिन्छ सकिन्छ होला।’