काठमाडौं। आफ्नो राष्ट्रिय टोलीलाई प्रत्यक्ष रंगशालामा हेर्ने रहर हरेक समर्थकको हुन्छ। टाढा टाढाबाट यात्रा गर्दै आएर खेलाडीहरूलाई हौसला दिन हजारौं दर्शक उपस्थित हुने गर्छन्।
तर, अखिल नेपाल फुटबल संघ (एन्फा) ले भने इन्टरनेसनल वुमेन्स च्याम्पियनसिपअन्तर्गत नेपाल र म्यानमारबीच हुने फाइनल खेलको टिकट मूल्यमा १०० प्रतिशतसम्म वृद्धि गर्दै दर्शकलाई मैदानसम्म पुग्न कठिन बनाएको छ।
आइतबारसम्म साधारण पारापिटतर्फ पाँच सय र भिआइपीतर्फ एक हजारको दरमा टिकट विक्री हुँदै आएको थियो। तर, सोही रातबाट टिकटको मूल्य १०० प्रतिशतले बढाउँदै साधारण पारापिटतर्फ एक हजार र भिआइपीतर्फ दुई हजार बनाइएको हो। यसमा पनि एन्फाको आफ्नै तर्क छ।
प्रवक्ता सुरेश शाह भन्छन्, ‘सुरक्षाका कारण टिकटको मूल्य बढाइएको हो। यसको खास कारण भनेको धेरैभन्दा धेरै दर्शकलाई आउनबाट रोक्नु हो।’
एन्फाले गत माघ २९ गते पत्रकार सम्मेलन गर्दै टेलिभिजन ब्रोडकास्टिङ, मार्केटिङ, टिकेटिङ र डिजिटल अधिकार ब्रान्ड डिजिटल लोजिकलाई प्रदान गरिएको जानकारी दिएको थियो।
उक्त पत्रकार सम्मेलनमा शाहले नै साधारण पारापिटतर्फ पाँच सय र भिआइपीतर्फ एक हजार रुपैयाँमा टिकट विक्री गरिने जानकारी दिएका थिए। तर, नेपाल फाइनल पुगे या नपुगे टिकटको मूल्य बढ्ने या घट्ने कुनै जानकारी उनले दिएका थिएनन्।
तर, लिग चरणअन्तर्गत लेबनानलाई १–० ले पराजित गर्दै एक खेलअगाबै नेपाल फाइनलमा पुगेपछि भने एक्कासी अचाक्ली रुपमा टिकटको मूल्य बढाइएको हो।
तर, मंगलबार पत्रकारसमक्ष पुन: प्रस्तुत भएका शाहले आफ्नो भनाइको बचाउ गर्दै सम्झौतामा नै नेपाल फाइनल पुगे टिकटको मूल्य बढाउने कुरा उल्लेख गरेको जिकिर गरे।
उनले भने,‘हामी फाइनलमा पुग्यौं भने टिकटको मूल्य बढाउने भन्ने सम्झौतामा उल्लेख थियो। त्यसकारण मूल्य बढाइएको हो।’
उनका अनुसार त्रिपुरेश्वरस्थित दशरथ रंगशालाको क्षमता १५ हजार तीन सय छ। त्यसकारण साधारण पारापिटतर्फ एन्फाले १० हजार पाँच सय टिकेट विक्री गर्न अनुमति दिएको छ। यस्तै, भिआइपीतर्फ भने १२ सय ५० मात्रै टिकट विक्री गर्न अनुमति दिइएको छ।
बाँकी सिट भने अतिथि र एन्फा पदाधिकारीलगायतलाई छुट्टाइएको छ। यसरी एकाएक टिकटको मूल्य वृद्धि गर्दा रंगशालाले धन्न सक्ने दर्शक मात्रै आउने उनको आफ्नै विश्लेषण छ। उनी दाबी गर्दै भन्छन्, ‘मूल्य बढाउँदा सुरक्षाको पाटोलाई पनि मजबुत बनाउन सकिन्छ भन्ने आशय हो। यसले गर्दा प्रतियोगितालाई पनि हाइप दिन्छ।’
शाहका अनुसार खेल हेर्न पाँच वर्षभन्दा माथिका बच्चासमेत लान पाइने छैन। नेपालले लिग चरणमा किर्गिस्तान र लेबनानलाई समान १–० ले हराउँदै फाइनलमा स्थान बनाएको हो। म्यानमारसँग भने २–२ को बराबरी खेल्यो।
म्यानमारले भने लेबनानलाई ३–१ र किर्गिस्तानलाई ५–० ले पराजित गर्दै लिग विजेता बनेर नेपालसँगको भेट पक्का गरेको थियो। यी दुईबीचको फाइनल बुधबार साँझ ६ बजे दशरथ रंगशालामा हुने तय छ।
