श्यामको निर्णायक गोलसँगै सुदूरपश्चिम फाइनलमा

धनगढी। श्याम बियाडीको निर्णायक गोलसँगै सुदूरपश्चिम प्रदेश फुटबल एसोसिएसन जय पृथ्वीबहादुर गौरीगंगा राष्ट्रिय फुटबल प्रतियोगिताको फाइनलमा प्रवेश गरेको छ।

गौरीगंगा–११ स्पोर्ट्स क्लबको मैदानमा आइतबार सम्पन्न पहिलो सेमिफाइनलमा सुदूरपश्चिमले कर्णाली प्रदेश फुटबल एसोसिएसनलाई १–० ले पराजित गरेको हो।

सुदूरपश्चिमको जितमा श्यामले पहिलो हाफको इन्जुरी समयमा गरेको गोल नै निर्णायक बन्यो। खेलको म्यान अफ द म्याच भने गोलकिपर कुम्भ देउवा रहे।

सुदूरपश्चिमले मधेश प्रदेशको नव नागृति युथ क्लबलाई पराजित गर्दै सेमिफाइनलमा स्थान बनाएको थियो। कर्णालीले भने आयोजक गौरीगंगालाई पाखा लगाएको थियो।

अब सुदूरपश्चिमले उपाधिका लागि लुम्बिनी प्रदेशको राइजिङ स्टार फुटबल क्लब र बागमती प्रदेशको लक्की स्टार क्लबबीचको विजेतासँग खेल्नेछ। यी दुईबीचको खेल सोमबार हुनेछ।