सोमरको औंला भाँचियो

काठमाडौं। इन्टर मिलानका गोलकिपर यान सोमरको दायाँ औंला भाँचिएको छ। योसँगै स्विस गोलकिपरले सिरी ए र च्याम्पियन्स लिगका महत्त्वपूर्ण खेलहरू गुमाउने जोखिम बढाएको छ।

इन्टरले बिहीबार गरेको परीक्षणमा सोमरको औंला भाँचिएको पुष्टि गरेको हो। आवश्यक उपचार प्रक्रियाबारे छिट्टै निर्णय गरिने क्लबले जनाएको छ। सामान्यतया औंलाको चोटले  सोमरलाई केही हप्तासम्म मैदानबाहिर राख्न सक्छ। तर, इन्टरले उनको पुनःकमब्याकको समय तालिका खुलाएको छैन।

सिरी ए च्याम्पियन इन्टर हाल लिगको दोस्रो स्थानमा छ, शीर्ष स्थानको नापोलीभन्दा दुई अंकले पछि। इन्टरले अर्को हप्ता नेपल्स यात्रा गर्नेछ, तर त्यसअघि शनिबार जिनोआसँग खेल्नेछ।

च्याम्पियन्स लिगको राउन्ड अफ १६ का खेलहरू मार्च ४ वा ५ अनि मार्च १० वा ११ मा तय गरिएका छन्। इन्टरले शुक्रबार हुने ड्रमा फेयनोर्ड वा पिएसभी आइन्धोभेनमध्ये कुनै एक टोलीको सामना गर्नेछ।

सोमरको अनुपस्थितिमा इन्टरसँग राफाएले दी जेनारो र जोसेप मार्टिनेजजस्ता विकल्प छन्।