नेपालले पहिलोपल्ट कबड्डी विश्वकप खेल्ने

काठमाडौं । नेपाली कबड्डी टिमले पहिलोपल्ट विश्वकप खेल्ने भएको छ । ‘वुमेन्स कबड्डी वर्ल्डकप २०२५’ मार्चमा पटना, विहारमा आयोजना हुँदैछ, जसमा नेपाली राष्ट्रिय महिला  टिमले खेल्ने भएको हो ।

नेपाल कबड्डी संघका महासचिव अरविन्दकुमार झाले भने, ‘नेपाली महिला टिमले दक्षिण एसियाली खेलकुद (साग), एसियाली खेलकुद तथा आमन्त्रण प्रतियोगिताहरू धेरैपल्ट खेलेको छ । विश्वकप भने पहिलोपल्ट खेल्न लागेको हो ।’

नेपालले पछिल्लोपल्ट चीनको हाङचोउमा भएको १९ औं एसियाली खेलकुद २०२२ मा कांस्यपदक जितेको थियो ।

मुख्य प्रशिक्षक पार्वती राईले पनि नेपालले पहिलोपल्ट कबड्डी विश्वकप खेल्न लागेको पुष्टि गरिन् । उनले भनिन्, ‘म आफै खेलाडी हुँदा वल्र्ड च्याम्पियनसिप खेलेकी छु । पुरुष टिमले दुईपल्ट वर्ल्ड च्याम्पियनसिप खेलेको छ । तर, वर्ल्डकप खेल्न लागेको चाहिँ पहिलोपल्ट नै हो ।’ उनकै नेतृत्वमा नेपालले एसियाडमा कांस्य जितेको थियो ।

नेपाली महिला टिमल १३ औं सागमा रजत, ११ र १२ औं सागमा कांस्यपदक पनि हात पारेको थियो ।

नेपाल कबड्डी लिग (एनकेएल) को टिम जनकपुर नाइट्सका मुख्य प्रशिक्षकसमेत रहेकी राईकै नेतृत्वमा राष्ट्रिय महिला टिमले विश्वकप २०२५ को तयारी गरिरहेको छ । संघले १६ खेलाडीलाई समावेश गर्दै मंसिर १ देखि कागेश्वरी मनोहरामा बन्द प्रशिक्षण सञ्चालन गरेको छ । 

संघका महासचिव झाकाअनुसार फेरि एकपल्ट खेलाडीको छनोट गरी एनकेएलपछि नेपाली टिमले विश्वकपको तयारीमा एक महिना भारतमा प्रशिक्षण गर्नेछ । अहिले टिमलाई मुख्य प्रशिक्षक पार्वती राईसहित विष्णु भट्ट, लोकबहादुर विष्ट, हरिणा थापा र दिल्लीबाट आएका कोम सिंहले प्रशिक्षण दिइरहेका छन् ।

फेरि बिहारमा विश्वकप

महिला कबड्डीको लगातार दोस्रोपल्ट विहारमा हुन लागेको हो । सन् २०१२ मा भएको पहिलो संस्करण पनि पटनाकै पाटलीपुत्र स्पोर्ट्स कम्प्लेक्समा भएको थियो, जसमा अमेरिका, मेक्सिको, जापान, इटालीसहित १६ देशले प्रतिस्पर्धा गरेका थिए । सनसनीपूर्ण फाइनलमा इरानलाई हराएर भारत च्याम्पियन भएको थियो ।

वुमेन्स कबड्डी वर्ल्डकपको दोस्रो संस्करण पटनाकै ५ हजार दर्शक क्षमताको राजगिर स्पोर्ट्स एकेडेमीमा सञ्चालन गर्ने अन्तर्राष्ट्रिय कबड्डी महासंघले जनाएको छ ।

यसपाली नेपाल, भारत, चीन, जापान, दक्षिण कोरियासहित एसियाका ६ ९संभवत् पाकिस्तान पनि० तथा युरोप, अफ्रिका र दक्षिण अमेरिकासहित गरी कुल १४ देश सहभागि हुने बताइएको छ ।