अवधैनिक ओलम्पिकलाई कारबाही गर्न कांग्रेसको माग

काठमाडौं । नेपाली कांग्रेसको भ्रातृ संस्था नेपाल लोकतान्त्रिक खेलकुद संघले अवैधानिक निर्वाचन गराउने नेपाल ओलम्पिक कमिटीलाई कारबाहीको माग गरेको छ ।

संघले आईतबार पत्रकार सम्मेलनको आयोजना गरेर राज्यको ऐन, कानुन, अड्डा, अदालतको खिल्ली उडाउँदै गैर कानूनी कार्य गर्ने व्यक्ति, संघ, संस्थालाई कानूनी दायरामा ल्याउन माग गरेको हो । 

अदालत र सरकारको निर्देशन लत्याउँदै जीवनराम श्रेष्ठ नेतृत्वको ओलम्पिक कमिटीले गरेको अवैधानिक निर्वाचनको विरुद्धमा कुनैपनि राजनीतिक दलको खेलकुद सम्बन्धि भ्रातृ संगठनले पहिलो पटक पत्रकार सम्मेलन गरेर औपचारिक धारणा सार्वजनीक गरेको हो । 

अदालतको अवहेलना गर्दै आफ्नो स्वार्थ सिद्धिका लागि लामो समयदेखि निर्वाचन समेत नगरी बसेको संघलाई सदस्यको मान्यता दिई गरेको निर्वाचन कार्यलाई कांग्रेसको भ्रातृ संघले भत्र्सना गरेको छ । 

‘गैर कानुनी र सम्मानित अदालतको निर्णयलाई अपहेलित गर्ने व्यक्ति संघ र नेपाल ओलम्पिक कमिटीलाई सम्मानित अदालतको अपहेलना मुद्धा सहित कडा भन्दा कडा कारबाही गरी सर्वोच्च अदालतबाट भएको वैधानिक निर्णय कार्यान्वनय गराउन सरकारसँग माग गर्दछौं ।’ महासचिव दिपक गुरुङ्गले भनेका छन् ।

निर्वाचन नभएका संघका नेतृत्व र संघको निर्वाचनबाट भागेका पदाधिकारीलाई आधिकारिक प्रतिनिधि बनाएर जीवनराम श्रेष्ठले ओलम्पिकको निर्वाचनबाट आफुलाई अध्यक्षमा घोषणा गरेका छन् । जीवनराम श्रेष्ठको अवैधानिक निर्वाचन प्रकृयामा साथ दिने कांग्रेस निकटकै खेल पदाधिकारीको बाहुल्यता छ । उनीहरुकै आडमा जीवनराम श्रेष्ठले अवैधानिक तरिकाले विधान संशोधनदेखि जबर्जस्ती निर्वाचन प्रकृयाबाट आफुलाई अध्यक्षमा स्व–घोषणा गरेका थिए ।